राजस्थानातून वाहन चोरट्याला अटक
सात महिन्यांनंतर कारचा शोध; कल्याण पोलिसांच्या पथकाला यश
टिटवाळा, ता. १९ (वार्ताहर) : शहरातील रेजन्सी सर्वम परिसरातून चोरीला गेलेली कार सात महिन्यांनंतर राजस्थानातून शोधून काढण्यात कल्याण तालुका पोलिस ठाण्याच्या गुन्हे प्रकटीकरण पथकाला यश आले आहे. या प्रकरणात जोधपूर येथून मुख्य आरोपीला अटक केली असून चोरीला गेलेली गाडी जप्त केली आहे.
आंध्र प्रदेशातील बाळा कोटेश्वराव व्यंकटसुबाराव लिंगोनेनी यांच्या मालकीची कार अज्ञात चोरट्याने २३ जानेवारीला शहरातील पार्किंगमधून चोरून नेली होती. याप्रकरणी कल्याण तालुका पोलिस ठाण्यात गुन्हा दाखल केला होता. गुन्ह्याच्या तपासासाठी पोलिस निरीक्षक बाळा कुंभार यांच्या नेतृत्वाखालील पथकाने घटनास्थळावरील सीसीटीव्ही फुटेज, कॉल डेटा रेकॉर्ड, सबस्क्रायबर डिटेल्स यांचे सखोल विश्लेषण केले. तपासादरम्यान सुरेश काळूराम उदाणी (रा. उधाणी की धनी, ता. फलोदी, जि. जोधपूर) याच्यावर संशय बळावला; मात्र आरोपी सातत्याने मोबाईल क्रमांक बदलत असल्याने त्याला शोधणे अडचणीचे ठरत होते; मात्र पोलिस अंमलदार योगेश निर्मळ व कुणाल बावदाणे यांनी चिकाटीने तपास पुढे नेत तांत्रिक साधनांचा वापर करून आरोपीचा मागोवा घेतला. अखेर राजस्थानातील जोधपूर येथे आरोपीला अटक करण्यात आली. चौकशीत त्याने गुन्ह्याची कबुली दिली असून त्याच्याकडून कार आणि बनावट चावी जप्त केली आहे.
पोलिस अधीक्षक डॉ. डी. एस. स्वामी, उपविभागीय पोलिस अधिकारी मिलिंद शिंदे यांच्या मार्गदर्शनाखाली ही कारवाई पार पडली. या मोहिमेत निरीक्षक बाळा कुंभार, सहाय्यक निरीक्षक नितीन मुदगुंन, उपनिरीक्षक जयवंत वारा, दीपक कुशारे, हवालदार बडगे, देसले, पोलिस अंमलदार भोईर, काळे, गुजर आणि पोलिस अधीक्षक कार्यालयातील रवींद्र मोरे, दीपक गायकवाड यांनी महत्त्वाची भूमिका बजावली.