मौनीबाबा शाळेच्या मुख्याध्यापिकेवर गुन्हा
पोषण आहारात घोटाळा केल्याचा आरोप
अंबरनाथ ता. १९ (वार्ताहर) : अंबरनाथ तालुक्यातील वांगणी येथील मौनीबाबा विद्यालयात शालेय पोषण आहाराची चोरी व विक्री होत असल्याचे स्थानिकांनी उघडकीस आणले होते. याबाबत समता महिला बचत गटावर भ्रष्टाचाराचे आरोप करण्यात आले होते. दरम्यान, याप्रकरणी बचत गटाच्या अध्यक्षा मनीषा पोल यांनी आरोप फेटाळून बेमुदत उपोषणाचा पवित्रा घेतला होता. त्यांच्या लढ्याला अखेर यश आले असून, शाळेच्या मुख्याध्यापिकेवर गुन्हा दाखल झाला आहे. आहाराची चोरी आणि विक्री असा ठपका ठेवत गटशिक्षणाधिकारी विशाल पोतेकर यांनी गुन्हा दाखल केला. सुमारे ८० हजारांचे तांदूळ शाळेतून अपहार झाल्याचे तक्रारीत नमूद केले आहे.

मौनीबाबा विद्यालयात मोठ्या प्रमाणात शालेय पोषण आहारात घोटाळा आणि भ्रष्टाचार झाला होता. याबद्दल समता महिला बचत गटावर आरोप करण्यात आले होते. समता महिला बचत गटाशी शाळेतील मुलांना आहार शिजवून देण्याचा करार केला होता. त्यामुळे त्यांच्यावर आहाराचा अपहार केल्याचा आरोप शाळेने केला होता. दरम्यान, बचत गटाच्या अध्यक्षा पोल यांनी आरोप फेटाळून हा सर्व भ्रष्टाचार उघडकीस आणला होता; तरीही त्यांच्यावरच आरोप होत असल्याने पोल यांनी अंबरनाथ पंचायत समितीसमोर बेमुदत उपोषण करीत सखोल चौकशी करण्याची मागणी केली होती. अखेर सहाव्या दिवशी गटशिक्षणाधिकाऱ्यांना घेराव घातल्यानंतर या प्रकरणाची सखोल चौकशी करण्यासाठी ठाणे जिल्हा परिषद येथे झालेल्या ६ मे रोजीच्या सुनवणीत विशेष समिती स्थापन करण्याचे आदेश शिक्षण अधिकारी बाळासाहेब राक्षे यांनी दिले होते. त्यानुसार चार सदस्यांची एक समिती स्थापन केली होती. या समितीचे अध्यक्ष विशाल पोतेकर, अधिक्षक नीलम पाटील, सदस्य सचिव राजकुमार जतकर, विस्तार अधिकारी देवदत्त शिंदे यांनी सखोल तपास केला तसेच शाळेला प्रत्यक्ष भेट दिली असता, या वेळी अभिलेखाप्रमाणे शाळेकडे तांदळाच्या १०४ गोणी शिल्लक असणे आवश्यक होते. मात्र गोणी गोदामात आढळून न आल्याने अभिलेखाप्रमाणे शाळेकडूनच आहाराचा अपहार झाल्याचे निष्पन्न झाल्याने मुख्याध्यापिका लक्ष्मी रामपती चौबे यांच्यावर गुन्हा दाखल केला आहे.