रोह्यात सामूहिक भातलावणी महोत्सव
पारंपरिक गाण्यांची मेजवानी
रोहा, ता. १९ (बातमीदार) : तालुक्यातील निवी येथील तरुणांनी उन्हाळी हंगामात तब्बल सहा एकर जमिनीत कलिंगड, विविध प्रकारचा भाजीपाला अशी प्रायोगिक शेती यशस्वी केली. त्यानंतर सामूहिक भातलावणी महोत्सव येथील शेतकऱ्यांसाठी पर्वणी ठरत आहे. सलग तीन दिवस चाललेल्या लावणी महोत्सवात लायन्स क्लब ऑफ रोहा, कृषी विभाग, बळीराजा फाउंडेशन आणि विविध पर्यावरण, शेतीप्रेमी संस्था, व्यक्तींनी सहभाग घेत भातलावणीचा आनंद घेतला. ‘मेव्हणीच्या ताटी खोबऱ्याची वाटी, मेव्हणा जिभल्या चाटी गं...’, ‘लावला तुळशीचा माडा, सीताबायच्या दारा गं...’ अशा अनेक पारंपरिक गाण्यांनी सामूहिक शेतीचा लावणी महोत्सव उत्‍साहात पार पडला.
येथील युवा कृषी उद्योग परिवाराने यंदाच्या वर्षी सहा एकर शेतीत कर्जत ९, रत्ना, ज्योतिका अशा भाताच्या बियाण्यांची लागवड केली. यासाठी रोहा तालुका कृषी विभागाने विविध प्रकारचे सहकार्य केले आहे. भातलावणीत कृषी अधिकारी, लायन्स क्लबच्या पदाधिकाऱ्यांनी सहभाग घेत साऱ्यांचे लक्ष वेधून घेतले, तर भातलावणीचे ब्रँड, युवा कृषी उद्योग परिवाराने समोर आणल्याने सर्वत्र कौतुक होत आहे. लायन्स क्लबचे नवनिर्वाचित अध्यक्ष लक्ष्मण शिट्याळकर आणि सहकाऱ्यांनी सामूहिक शेती भातलावणीत सहभाग घेऊन चिखल, मातीतला आनंद द्विगुणित केला. शनिवारी रोहा तालुका कृषी अधिकारी महादेव करे व सर्व कृषी सहाय्यकांनी सामूहिक भातलावणीचा आनंद घेतला. चारसूत्री (दोरी लावणी) तंत्रयुक्त पद्धतीने कृषी विभागाच्या माध्यमातून भातलावणी करण्यात आली. प्रायोगिक शेतीबद्दल माहिती देत कृषी अधिकारी, लायन्स क्लबचे पदाधिकारी भातशेती लावणीत रमून गेले. या वेळी कृषी अधिकारी केवळ योजनांचा कित्ता गिरवणारा नसावा तर तो प्रत्यक्ष शेतात उतरून काम करणारा कृतिशील असावा, अशी भावना बळीराजा फाउंडेशनचे अध्यक्ष राजेंद्र जाधव यांनी व्यक्त केली.