वाणगाव, ता. १९ (बातमीदार) : आजच्या पिढीला केवळ वाहने चालविण्याचा अधिकार मिळतो; पण त्याचबरोबर शिस्त आणि जबाबदारी यांची जाणीव करून देणे ही समाजाची गरज आहे. पालघर वाहतूक शाखेचा हा उपक्रम समाजाभिमुख पोलिस प्रशासनाचे उत्तम उदाहरण म्हणता येईल. सुरक्षेचा संदेश प्रत्येक तरुणांपर्यंत पोहोचविणे आवश्यक आहे. रस्ते सुरक्षा ही केवळ कायदेशीर जबाबदारी नसून नैतिक जबाबदारीही आहे, यावर नवतरुणांनी भर देणे आवश्यक आहे. जिल्हा वाहतूक शाखा पालघर ही भविष्यातील विविध शाळा, महाविद्यालयांमध्ये जनजागृती उपक्रमांचे आयोजन करणार असल्याचे प्रतिपादन पोलिस उपनिरीक्षक संदीप नांगरे यांनी वानगावच्या फार्मसी महाविद्यालयात आयोजित वाहतूक नियम जनजागृती कार्यक्रमात केले आहे. पालघर जिल्ह्यात अपघातांचे प्रमाण कमी करण्यासाठी आणि नवतरुणांमध्ये सुरक्षित वाहन चालवण्याबाबत जागरूकता निर्माण करण्याच्या उद्देशाने जिल्ह्यात पालघर वाहतूक शाखेतर्फे महाविद्यालयात वाहतूक नियम जनजागृती उपक्रम राबविण्यात आला. या वेळी जिल्हा वाहतूक शाखा प्रभारी अधिकारी पालघर सुरेश साळुंखे, पोलिस उपनिरीक्षक संदीप नांगरे, बारक्या सुतार, हवालदार संतोष हाडळ यांसह प्राचार्य डॉ. श्रीराम बैरागी उपस्थित होते.