‘पालकांनो, मुलांना स्कूल बसने पाठवताय तर सावधानता बाळगा’
नवी मुंबई पोलिसांच्या सूचना : नवीन नियमावलीचे पालन बंधनकारक

नवीन पनवेल, ता. १९ (बातमीदार) ः मुलांची शाळा घरापासून लांब अंतरावर असेल आणि पालकांना स्वत: मुलांना शाळेत सोडणे शक्य नसेल तर अशावेळी हमखास वापरला जाणारा पर्याय म्हणजे स्कूल बस. पण या स्कूल बसने मुलाची पाठवणी करताना काही गोष्टींची खातरजमा करणे आवश्यक आहे. मुलांच्या सुरक्षिततेसाठी पालकांनी आवश्यक त्या बाबींची पडताळणी करून घ्यावी, अशा सूचना नवी मुंबई पोलिसांकडून देण्यात येत आहेत.
मुलांसाठी शाळेच्या बसची तपासणी करताना पालकांनी काही महत्वाच्या गोष्टी तपासून घेणे काळाची गरज आहे. विद्यार्थ्यांसोबत बसमध्ये होणारे गैरप्रकार, अपघात, निष्काळजीपणा या बाबी वारंवार पहायला मिळतात. मात्र, दुसरी सोय नसल्याने नाईलाजाने पालकांकडून अशा स्कूलबसची निवड केली जाते. अशावेळी घाईत किंवा गरजेपोटी पालकांनी चुकीच्या स्कुलबसची निवड केली तर आपल्या मुलांना नुकसान पोहचू शकते याबाबत सावध राहणे गरजेचे आहे. स्कूलबस लावलीच असेल तर मुलांशी मोकळा संवाद साधून त्यांना त्या बसने जाताना, चालकासोबत खरोखर सुरक्षित वाटते का याबाबत विश्वासात घेऊन वेळोवेळी विचारत राहावे.

मुलांच्या सुरक्षिततेसाठी पाच सूचना
पालकांनी स्कूल बस आरटीओमार्फत अधिकृतरीत्या नोंदणीकृत आहे का ते तपासावे. ड्रायव्हर, क्लीनर यांच्याकडे पोलिस व्हेरिफिकेशन आहे का याची खात्री करावी. बसमध्ये प्रथमोपचार किट आणि फायर एक्टिंग्विशर आहे का ते तपासा. जीपीएस ट्रॅकिंग आणि सीसीटीव्ही सुविधा आहेत का याची चौकशी करा. बसमध्ये विद्यार्थ्यांसोबत शिक्षक किंवा काळजीवाहक उपस्थित राहणे आवश्यक आहे.

मुलांना स्कूल बसने पाठवताना त्यामध्ये आवश्यक त्या नियमावलीचे पालन केले जात आहे की नाही याची पालकांनी खातरजमा करणे आवश्यक आहे. नवी मुंबई पोलिस सदैव नागरिकांच्या सेवेसाठी तत्पर आहेत. एखाद्या स्कूल बसमध्ये शासनाच्या नियमावलीचे पालन होत नसेल किंवा बालकांसंदर्भात काही तक्रार असेल तर चाइल्ड हेल्पलाइन १०९८ किंवा नवी मुंबई पोलिस हेल्पलाइन ८८२८११२११२ या क्रमांकावर संपर्क साधावा.
- नाथ लोखंडे, सहाय्यक पोलिस निरीक्षक वाहतूक शाखा, बेलापूर