भिवंडीत बनावट बटरचा कारखाना उद्ध्वस्त
अन्न व औषध प्रशासनाच्या कारवाईत दोघांना अटक
भिवंडी, ता. १९ (वार्ताहर) : भिवंडी शहरात अन्न व औषध प्रशासनाने (एफडीए) शांतीनगर पोलिसांच्या मदतीने एका बनावट बटर उत्पादन कारखान्यावर छापा टाकत दोघांना ताब्यात घेतले आहे. यामुळे शहरातील किराणा दुकाने आणि हातगाड्यांवर सर्रासपणे मिळणारे बटर बनावट असल्याचा संशय बळावला आहे.
भिवंडीत बनावट अमूल बटरचे उत्पादन सुरू असल्याची गोपनीय माहिती एफडीए प्रशासनाला मिळाली होती. या माहितीच्या आधारे, प्रशासनाचे सहाय्यक आयुक्त संतोष सिरोसिया आणि अन्न सुरक्षा अधिकारी शुभांगी करणे यांनी शांतीनगर पोलिस उपनिरीक्षक काढू गवारे यांच्या पथकासह गुरुवारी (ता. १७) नागाव भागातील भुसावळ कम्पाउंड, कासिमपुरा येथील एका गोदामावर धाड टाकली. या छाप्यात अमूल कंपनीच्या १०० ग्रॅम आणि ५०० ग्रॅम वजनाचे बनावट बटर तयार केले जात असल्याचे निदर्शनास आले. झीशान मुस्ताक अन्सारी आणि मोहम्मद मुदस्सिर मोहम्मद अक्रम हे दोघे रिफाइंड पामोलीन तेल, रिफाइंड वनस्पती तेल, मीठ आणि बटर फ्लेवर वापरून हँड मिक्सर मशीनच्या सहाय्याने बनावट बटर तयार करीत होते.
याप्रकरणी आरोपी झीशान मुस्ताक अन्सारी आणि मोहम्मद मुदस्सिर मोहम्मद अक्रम यांच्यासह त्यांना मदत करणाऱ्या इतर संबंधित व्यक्तींविरुद्ध शांतीनगर पोलिस ठाण्यात गुन्हा दाखल करण्यात आला आहे, अशी माहिती संतोष सिरोसिया यांनी दिली.

बेकायदा कारखाना
शुभांगी करणे यांनी धाडसत्रानंतर ५०० ग्रॅम वजनाच्या बनावट बटरचे, रिफाइंड पामोलीन तेल, वनस्पती तेल आणि मिठाचे नमुने तपासणीसाठी घेतले. तसेच घटनास्थळावरून १८० बटर पाकिटे, ७३.४ किलो रिफाइंड पामोलीन तेल, ७३.४ किलो वनस्पती तेल, बनावट लेबलची रिकामी पाकिटे आणि रिकामे कार्टून बॉक्स असा एकूण एक लाख १३ हजार रुपयांचा मुद्देमाल जप्त केला. हा कारखाना अन्नसुरक्षा व मानके कायदा २००६ अंतर्गत परवानाधारक नसल्याचेही आढळून आले.