पालिका शाळेतील मुलांना ‘इंग्रजीमध्ये बोला पटकन’ पुस्तक भेट
जुईनगर, ता. १९ (बातमीदार) : संतोष सुतार प्रतिष्ठान यांच्या तर्फे नेरुळ येथील शिरवणे शाळेतील विद्यार्थ्यांना इंग्रजीमध्ये बोला पटकन या पुस्तकाचे वाटप करण्यात आले. नवी मुंबई महापालिका शाळेतील विद्यार्थी दिवसागणिक प्रगती करत असून त्यांच्या यशाला आणखी उंच भरारी मिळावी म्हणून या पुस्तकाचे वाटप करण्यात आल्याचे सांगण्यात येत आहे.
नवी मुंबई शहरात विमानतळासह अनेक मोठे उद्योग व्यवसाय निर्माण झाले आहेत. अशावेळी मुलांना नोकरी व्यवसाय करताना संभाषणात अडथळा येऊ नये. सहजरित्या नोकरी व्यवसायात प्रगती साधता यावी. शिवाय जगातील व्यवहाराची भाषा म्हणून इंग्रजी भाषेला प्राधान्य देण्यात येते. त्यामुळे आपल्या मातृभाषेबरोबर इंग्रजी भाषा महापालिकेत शिकणाऱ्या विद्यार्थ्यांना अवगत व्हावी यासाठी या पुस्तकांचे वाटप करण्यात आल्याचे सांगण्यात येत आहे. प्रतिदिन इंग्रजी वाचनाने इंग्रजी भाषा बोलण्याचे सूत्र विद्यार्थ्यांच्या हाती येईल अशा विश्वास मार्गदर्शकाकांडून व्यक्त करण्यात आला.
या प्रसंगी संस्थापक संतोष सुतार, अध्यक्ष सचिन सुतार, शाळेच्या मुख्याध्यापिका साळवी, अमृत पाटील, प्रतीक यादव आदी मान्यवर उपस्थित होते.