कर्जतमध्ये महिलांसाठी अत्याधुनिक ‘स्मार्ट वॉशरूम’
स्वच्छता, सुरक्षिततेच्या दिशेने एक महत्त्वाचं पाऊल
कैलास म्हामले
कर्जत, ता. १९ ः शहरात महिलांच्या गरजांनुसार उभारलेल्या पहिल्या अत्याधुनिक स्मार्ट वॉशरूमचे उद्‍घाटन शनिवारी (ता. १९) कर्जत रेल्वे स्थानकाजवळ असलेल्या भिसेगाव बस थांब्याजवळ आमदार महेंद्र थोरवे यांच्या हस्ते संपन्न झाले. सार्वजनिक बांधकाम विभाग आणि वूलु संस्थेच्या संयुक्त प्रयत्नातून हे वातानुकूलित स्वच्छतागृह उभारले आहे. वातानुकूलित आणि सर्व सोयीसुविधांयुक्त नया भारत का स्मार्ट वॉशरूम या संकल्पनेतलं कर्जतमधील हे पहिलं स्वच्छतागृह आहे.
भिसेगाव परिसरात मागील अनेक वर्षांपासून महिलांसाठी सार्वजनिक शौचालयाची सुविधा नव्हती. त्यामुळे महिलांना मोठ्या अडचणींचा सामना करावा लागत होता. आता हे अत्याधुनिक स्मार्ट स्वच्छतागृह उपलब्ध झाल्यामुळे महिलांची मोठी सोय झाली आहे. हे स्वच्छतागृह सध्या केवळ महिलांसाठी असून, लवकरच पुरुषांसाठीही उभारणार असल्याची माहिती दिली आहे. यामुळे या परिसरातील नागरिकांना तसेच प्रवाशांना मोठा दिलासा मिळणार आहे. सकाळी सात ते रात्री नऊ नऊ या वेळेत हे स्वच्छतागृह महिलांसाठी खुले असणार असून येथे दोन महिला सुद्धा देखरेखीसाठी कार्यरत ठेवल्या आहेत.
सोयीसुविधायुक्त स्मार्ट वॉशरूम
हे स्मार्ट वॉशरूम केवळ स्वच्छतेपुरते मर्यादित न राहता, महिलांसाठी गरजेच्या असलेल्या सर्व सुविधांनी परिपूर्ण आहे. यामध्ये स्तनपान करणाऱ्या मातांसाठी वेगळी जागा आहे. तसेच, दोन शौचालयाच्या केबिन्स, वातानुकूलिन यंत्रणा, मोफत सॅनिटरी पॅडची सोय तसेच बाळांचे डायपर आणि इतर महिलांसाठी उपयुक्त वस्तू विक्रीसाठी ठेवल्या आहेत. तसेच, या स्वच्छतागृहामध्ये महिलांच्या स्वच्छतेसोबतच वातावरणालाही तितकंच महत्त्व देण्यात आलं आहे. यासाठी विशेष दुर्गंधी नियंत्रण यंत्रणा बसवली आहे. इतक्या सर्व सुविधांनी सज्ज असलेलं हे स्वच्छतागृह महिलांना फक्त पाच रुपयांमध्ये याचा वापरता येणार आहे.