‘दारुविरोधात महिलांनी रस्त्यावर उतरण्याची वेळ’
खासदार सुप्रिया सुळेंचे प्रतिपादनः शरद पवार गटाच्या वतीने महिला मेळावा व युवक मेळावा
खारघर, ता.१९ (बातमीदार) : राज्यात नवीन दारूची दुकाने नको, त्यासाठी सर्व महिलांनी पक्षभेद सोडून रस्त्यावर उतरण्याची वेळ आली तरी चालेल, असे खासदार सुप्रिया सुळे यांनी खारघर येथे सांगितले. यावेळी खासदार निलेश लंके, राष्ट्रवादी काँग्रेस शरद पवार गटाच्या महिला प्रदेशाध्यक्ष रोहिणी खडसे, उपाध्यक्षा भावना घाणेकर, पनवेल जिल्हा महिला अध्यक्षा राजश्री कदम यांच्यासह आदी मान्यवर उपस्थित होते.
शहर राष्ट्रवादी पक्ष शरद पवार गटाच्या वतीने महिला मेळावा व युवक मेळावा गुरुवारी (ता. १७) खारघरमध्ये पार पडला. यावेळी सुप्रिया सुळे म्हणाल्या, प्रत्येक मुलांना मातृभाषा आलीच पाहिजे, लहान मुलांचे शिक्षण हे खेळीमेळीचे असते. त्यामुळे त्यांच्यावर तिसरी भाषा लादू नये. तर, महिलांनी स्वयंरोजगारकडे लक्ष केंद्रित करणे आवश्यक आहे. महिलांनी तयार केलेल्या वस्तू, साहित्य मॉल, दुकानात वितरण करणे आवश्यक असल्याचे सांगितले.
तसेच, राज्यात नवीन दारूची दुकाने नको, त्यासाठी सर्व महिलांनी पक्षभेद सोडून रस्त्यावर उतरण्याची वेळ आली तरी चालेल. परंतु, नवीन दारूची दुकाने नको. तसेच, शाळा परिसरलगत दारू, सिगारेट, गुटखा विक्री दुकाने असता कामा नये. दारू आणि ड्रग्समुळे अनेक कुटुंबात गंभीर परिणाम होत असल्याचेही सुप्रिया सुळेंनी म्हंटले आहे.
यावेळी पक्षाच्या वतीने महिलांना घरगुती स्वयंरोजगार करता यावे यासाठी निलेश लंके प्रतिष्ठणच्या वतीने पन्नास महिलांना शिलाई वाटप करण्यात आले. यावेळी पनवेल जिल्हा महिला अध्यक्षा राजश्री कदम यांनी खारघरमध्ये संघर्ष समितीच्या वतीने खारघर दारूमुक्तीसाठी लढा सुरु आहे. या लढ्याला सुप्रिया सुळे सहकार्य करावे, असे सांगितले. यावेळी खासदार निलेश लंके, रोहिणी खडसे यांनी महिलांना स्वयंरोजगार विषयी मार्गदर्शन केले. यावेळी खारघर परिसरातील महिला मोठ्या संख्येने उपस्थित होत्या.