सानपाड्यात नागरी समस्यांमुळे नागरिक त्रस्‍त
तुर्भे सहाय्यक आयुक्तांना उपाययोजना करण्यासाठी निवेदन
तुर्भे, ता. १९ (बातमीदार) ः सानपाडा विभाग हा वेगाने विकसित होत आहे. दरम्यान, या विभागामध्ये मागील काही कालावधीत नागरिकांच्या विविध मूलभूत आणि नागरी समस्या वाढल्या आहेत. याबाबत नागरिकांकडून वेळोवेळी लेखी निवेदने सादर करण्यात आली आहेत. त्यातील अनेक विषय, समस्या अद्याप प्रलंबित आहेत. त्‍यामुळे विभागातील प्रलंबित समस्यासंदर्भात आढावा बैठकीचे नियोजन करावे, अशी मागणी सामाजिक कार्यकर्ते नीलेश कचरे यांनी केली आहे.
तलाव, जलनियोजन, वाहतूक नियोजन, आरोग्य सुविधा, सार्वजनिक वाहतूक, सुरक्षितता आणि सामाजिक-सांस्कृतिक बांधिलकी यासारख्या विविध क्षेत्रांतील समस्यांचे गांभीर्य लक्षात घेता, या सर्व मुद्द्यांचा सखोल आढावा घेण्यासाठी एक समन्वित विभागीय आढावा बैठक घेणे अत्यावश्यक झाले आहे. त्यामध्ये सानपाडा रेल्वे स्थानक परिसरातील वाहतूक कोंडी निवारणार्थ नवीन उड्डाणपूल किंवा भुयारी मार्गाची उभारणी करणे, पालिका प्रशासनाच्या दुर्लक्षामुळे विद्युत अपघातात अपंगत्व आलेल्या १३ वर्षीय विद्यार्थ्याला न्याय देणे, वाढत्या वाहनांमुळे उद्भवलेल्या पार्किंग समस्येवर उपाय म्हणून वाहनतळ उभारणी, लोकसंख्या वाढीच्या पार्श्वभूमीवर प्रशस्त माता-बाल रुग्णालय व सुसज्ज नागरी आरोग्य केंद्राची निर्मिती करण्याबाबत वेळोवेळी विविध प्रकारची निवेदने देण्यात आली आहेत. दरम्यान, आजतागायत याकडे दुर्लक्ष केले जात आहे. तसेच सानपाडा बस स्थानक सुसज्ज व सुशोभीकरण करून आधुनिक बस टर्मिनस उभारणे, मुंबई कृषी उत्पन्न बाजार समिती (एपीएमसी) परिसरात येणाऱ्या वाहनांसाठी पार्किंग आणि चालकांसाठी विश्रामगृह उपलब्ध करून देण्याची विनंतीदेखील या वेळी करण्यात आली आहे.
...........................
नवीन जलाशय टाकी उभारणे
जलसंपत्ती व्यवस्थापनाच्या दृष्टीने नवीन जलाशय टाकी उभारणे, सेक्टर चारमधील दत्तगुरू को-ऑप. हौ. सोसायटी ते झुणका भाकर केंद्रादरम्यान तुटलेले व धोकादायक फुटपाथ तातडीने दुरुस्त करणे, सेक्टर पाच गजानन महाराज चौक येथे आगरी-कोळी समाजाच्या योगदानाचे प्रतीक म्हणून स्थापत्य कलाकृती असलेला पुतळा उभारणे, सायन-पनवेल महामार्गावरील पादचारी पुलावर विद्युत प्रकाश व्यवस्था उपलब्ध करून देणे, सानपाडा विभागातील शासकीय इमारत व सार्वजनिक उद्यानांमध्ये सुरक्षा रक्षक नेमणे अशा महत्त्वाच्या मागण्या लेखी स्‍वरूपात निवेदनात देण्यात आल्या आहेत.