धोकादायक इमारतींना एनओसी देण्यात सुरुवात

सिडकोतर्फे हस्‍तांतर, तारणास ना हरकत दाखला

सकाळ वृत्तसेवा
नवी मुंबई, ता. १९ ः सिडकोनिर्मित मोडकळीस आलेल्या इमारतींमध्ये राहणाऱ्या रहिवाशांनाही सिडकोतर्फे हस्तांतर व तारण ठेवण्यास ना हरकत दाखला देण्यास सुरुवात झाली आहे. शिवसेनेचे ठाणे जिल्‍ह्याचे खासदार नरेश म्हस्के यांनी याबाबत सिडकोचे व्यवस्थापकीय संचालक विजय सिंघल यांच्याकडे अविरतपणे पाठपुरावा केला होता. अखेर त्यांच्या प्रयत्नांना यश आले असून काही दिवसांपासून रहिवाशांना ना हरकत दाखले देण्यास सुरुवात झाले असल्याची माहिती शिवसेनेचे नवी मुंबई जिल्हाप्रमुख किशोर पाटकर यांनी दिली.
नरेश म्हस्के यांनी काही दिवसांपूर्वी वाशी येथील शिवसेनेच्या मध्यवर्ती कार्यालयात जनता दरबार घेतला होता. या दरबारात आलेल्या नागरिकांनी विविध प्रश्न आणि समस्या मांडल्या होत्या. या वेळी सर्वाधिक जास्त समस्या अतिधोकादायक इमारतींमध्ये राहणाऱ्या कुटुंबीयांकडून देण्यात आल्या. सिडकोने तयार केलेल्या इमारती मोडकळीस आल्या आहेत. अशा इमारतींना महापालिकेने अतिधोकादायक घोषित केले आहे. त्यामुळे या इमारतींमध्ये राहणाऱ्या रहिवाशांना शिक्षण, लग्न आदी गरजांकरिता कर्ज काढायचे असल्यास मालमत्ता तारण ठेवायला सिडकोचा बँकेत ना हरकत दाखला द्यावा लागतो. तसेच घराची दुसऱ्या व्यक्तीला विक्री करायची असल्यास त्यासाठी हस्तांतर करण्यास सिडको ना हरकत दाखला देत नव्हती.

मालमत्ता तारणास सहमती
सिडकोच्या धोरणामुळे अतिधोकादायक इमारतीमध्ये राहणाऱ्या कुटुंबीयांची फरपट सुरू होती. याबाबत नरेश म्हस्के यांनी राज्य सरकारकडे पाठपुरावा केल्‍यानंतर अखेर सिडको हस्तांतर करण्यासाठी ना हरकत दाखला आणि कर्ज घेण्यासाठी मालमत्ता तारण ठेवण्यासाठी होकार दर्शवला. त्याचे वितरणही सुरू झाल्‍याची माहिती किशोर पाटकर यांनी दिली.