कैनाड प्लॉट घोटाळा
कोट्यवधींची फसवणूक; मुख्य आरोपी फरार
कासा, ता. १९ (बातमीदार) : डहाणूच्या कैनाड परिसरात प्लॉटिंग योजनेच्या नावाखाली कोट्यवधी रुपयांची फसवणूक उघड झाली आहे. या घोटाळ्याचा मुख्य सूत्रधार जयवंतराव नलावडे फरार असून पोलिस त्याचा शोध घेत आहेत.
तुळजाभवानी प्रॉपर्टीज प्रा.लि. कंपनीने २०२२ मध्ये ६२ प्लॉट्स विक्रीसाठी काढले होते. त्यासाठी प्रत्येकी गुंतवणूकदारांकडून ४० लाख रुपये घेतले होते. प्लॉटसह गुंतवणुकीचा परतावा किंवा २५ लाख रोख बोनस देण्याचे आश्वासन दिले; मात्र मुदत संपूनही काहीही मिळाले नाही. कंपनीची कार्यालये बंद झाली आणि नलावडे फरार झाला. याबाबत गुंतवणूकदारांनी थेट डहाणूतील कार्यालयात जाऊन तक्रार केली.
तक्रारीनंतर पोलिसांनी कंपनीच्या काही स्थानिक प्रतिनिधींना अटक केली असून, ज्यांच्या माध्यमातून नोटरीकडे करारनामे नोंदवले गेले होते, त्यांच्यावर कारवाई केली आहे. तर, दीड कोटी रुपयांची मालमत्ता जप्त केली आहे. किमान १०-१२ गुंतवणूकदारांची फसवणूक झाली असून, हा आकडा वाढण्याची शक्यता आहे. फसवणूक झालेल्या इतरांनी पालघर आर्थिक गुन्हे शाखेशी संपर्क साधावा, असे आवाहन पोलिसांनी केले आहे.