भटक्या कुत्र्यांच्या तक्रारीबाबत पालिका बेफिकिर
पालिकेच्या संकेतस्थळावर तक्रार करूनही प्रतिसाद नाहीः हेल्पलाईन निष्क्रीय
मुंबई, ता. १९ ः मुंबईत कुत्र्यांचा सुळसुळाट वाढला असून हल्ले होण्याचे प्रमाणही वाढले आहे. कुत्र्यांची झुंड दुचाकीस्वाराचा जीवघेणा पाठलाग करतानाचे चित्र मुंबईत सर्वत्र दिसते. मात्र, अशा मोकाट कुत्र्यांचा बंदोबस्त करण्याच्या तक्रारींबाबत पालिका बेफिकिर असल्याचे दिसते. पालिकेच्या संकेतस्थळावर तक्रारी केल्यास तिथेही प्रतिसाद मिळत नाही. अशा परिस्थितीत करायचे काय, अशी हतबलता मुंबईकर नागरिक व्यक्त करीत आहेत.
शहर आणि उपनगरात भटक्या कुत्र्यांचा उपद्रव वाढला आहे. कचरा साठविण्याच्या ठिकाणी, हाउसिंग सोसायट्यांबाहेर कुत्र्यांच्या झुंडी दिसून येतात. रात्रीच्या वेळी एखादा अनोळखी व्यक्ती दिसला तर ही भटकी कुत्री त्याच्यावर तुटून पडतात. मात्र, हा उपद्रव मुंबईभर दिसून येत आहे. त्याबाबत तक्रार केली तर त्याची दखल पालिका घेत नाही. पालिकेच्या संकेतस्थळावर नागरिकांनी तक्रार करूनही प्रतिसाद मिळत नसल्याच्याही तक्रारी आता वाढत आहेत. या गंभीर समस्येकडे पालिका बेकीफीर असल्याचे दिसते.

विक्रोळीत दहशत
विक्रोळी येथील हरियाली व्हिलेजमध्ये एका भटक्या कुत्र्यामुळे नागरिकांमध्ये भीतीचे वातावरण निर्माण झाले आहे. पालिकेला तक्रार करुनही त्यावर काहीही कार्यवाही करण्यात आलेली नाही. जखम झाल्याने एक कुत्रा गल्लोगल्ली पळत असल्याने स्थानिक नागरीकांमध्ये भीतीचे वातावरण निर्माण झाले आहे. त्यामुळे लहान मुलांना घराबाहेर सोडण्यास पालक घाबरत आहेत. याबाबत स्थानिक नागरीक काशिनाथ बारामते यांनी पालिकेच्या हेल्पलाईनशी संपर्क केला होता. मात्र, त्यांनी तक्रार घेण्यास नकार दिला व पशू वैद्यकीय आरोग्य विभागाकडे तक्रार करायला सांगितली. त्यानंतर त्यांनी पालिकेच्या अधिकृत संकेतस्थळावर तक्रार केली. त्यांचा तक्रार क्रमांक -आरजी २५०६००४३०५ असा आहे. २४ जून रोजी तक्रार दाखल करुनही पालिकेने तक्रारदाराशी संपर्क साधला नाही किंवा त्यांच्या तक्रारीवर कारवाई केली नसल्याचे बारामते यांनी सांगितले.

९१ हजार भटकी कुत्री
मुंबई महानगर पालिका आणि ह्युमन सोसायची इंटरनॅशनल इंडिया या संस्थेच्या माध्यमातून सर्वेक्षण करण्यात आले. त्यात ९१ हजार भटक्या कुत्र्यांची संख्या नोंदविण्यात आली आहे.

भटक्या कुत्र्याबाबत पालिकेच्या संकेत स्थळावर तक्रार केली, पालिकेच्या हेल्पलाईनवर तक्रार केली. मात्र त्याला काहीही उपयोग झाला नाही. प्रतिसाद मिळाला नाही. ही बाब गंभीर आहे.
- काशिनाथ बारामते, स्थानिक नागरिक, विक्रोळी