अनधिकृत पार्किंग व्यवस्थेवरून सिडकोला कायदेशीर नोटीस
सिडकोने बेकायदा पार्किंग तातडीने हटवावी
नवी मुंबई, ता. १९ (वार्ताहर) : सिडको मुख्यालयासमोरील पार्किंग व्यवस्था ही पूर्णतः बेकायदा व टाटा पॉवर उच्च वाहिनीखालील जागेवर केलेले अतिक्रमण आहे. ही बाब माहिती अधिकार कायद्यांतर्गत समोर आली असून, सजग नागरिक मंच नवी मुंबईच्या निदर्शनास आली आहे. त्यामुळे या जागेवरील पार्किंग हटवण्याबाबत मंचने सिडको प्रशासनाशी पत्रव्यवहार केला होता. मात्र सिडको व्यवस्थापनाने मंचच्या पत्रास केराची टोपली दाखवल्याने मंचने सिडकोला कायदेशीर नोटीस बजावली आहे.
महाराष्ट्र राज्य विद्युत नियमाच्या अटी व शर्तींनुसार उच्च दाब वाहिनीखालील जागा ही मानवाच्या दृष्टीने धोकादायक ठरत आहे. उच्च दाब वाहिनीखालील क्षेत्र हे मानवी हालचालीस प्रतिबंधित क्षेत्र असते. या नियमाची पायमल्ली करीत सिडकोने स्वतः अधिग्रहित न केलेल्या जमिनीवर अतिक्रमण करीत पार्किंग व्यवस्था उभारलेली आहे. या पार्किंग व्यवस्थेस वाहतूक विभाग व नवी मुंबई महापालिकेचे ना हरकत प्रमाणपत्र नसल्याने सिडको मुख्यालयासमोरील पार्किंग व्यवस्था ही बेकायदा वर्गात मोडत असल्याचे सजग नागरिक मंचचे पदाधिकारी सुधीर दाणी यांनी सांगितले.

पार्किंग व्यवस्थेवर ७० लाखांहून अधिक खर्च
सिडकोच्या अभियांत्रिकी विभागाने स्व-मालकी नसलेल्या जागेत पार्किंग व्यवस्था निर्माण करण्यासाठी पेव्हर ब्लॉक बसवणे, संरक्षक भिंत बांधणे, पार्किंगच्या दोन्ही बाजूस लोखंडी गेट बसविणे, सीसीटीव्ही बसविणे व पार्किंगच्या दैनंदिन व्यवस्थेसाठी सुरक्षा रक्षकांची नियुक्ती करणे, उच्च दाब वाहिनीखालील जागेवर शेड बांधणे, सामान्य नागरिकांच्या वाहनांना प्रतिबंध करण्यासाठी बॅरिकेडिंग व्यवस्था निर्माण करणे यासाठी ७० लाखांहून अधिक खर्च केल्याची बाब माहिती अधिकारातून सजग नागरिक मंचच्या निदर्शासनास आली आहे.

‘अधिकाऱ्यांकडून खर्च वसूल करा’
अशा प्रकारे सिडकोचा पर्यायाने नागरिकांच्या निधीचा अपव्यय करणाऱ्या अधिकाऱ्यांकडून हा खर्च वसूल करावा आणि बेकायदा पार्किंग व्यवस्था तातडीने बंद करावी, याकरिता कायदेशीर नोटीस वकील सुशांत जोशी यांच्यामार्फत सिडकोच्या व्यवस्थापकीय संचालकांना पाठवल्याची माहिती मंचचे सदस्य वकील डॉ. विशाल माने यांनी दिली.

सिडकोने योग्य ती कार्यवाही करावी
सिडको हे सरकारी महामंडळ असल्याने त्यांच्याकडून बेकायदा, अनधिकृत कृत्य होणे ही अत्यंत गंभीर बाब ठरते. सिडको पार्किंगची कायदेशीर वैधता तपासून सिडकोच्या व्यवस्थापकीय संचालकांनी योग्य ती कार्यवाही करावी, ही मंचची मागणी असल्याचे मंचच्या त्रिशीला कांबळे यांनी सांगितले.