पाणीचोरीचा मुद्दा प्रचारात रंगणार!
वनमंत्री गणेश नाईक यांचा महायुतीला घरचा आहेर
सकाळ वृत्तसेवा
नवी मुंबई, ता. १९ ः वनमंत्री गणेश नाईक यांनी आज महायुतीला थेट इशारा देत, नवी मुंबईला बारवी धरणातून मिळणाऱ्या ४० एमएलडी पाणीचोरीचा मुद्दा आगामी निवडणुकीत प्रचारासाठी वापरणार असल्याचे जाहीर केले. गेल्या आठ महिन्यांपासून हे पाणी नवी मुंबईला मिळत नसून, लोकप्रतिनिधींच्या अभावी नगरविकास विभागाने महापालिकेला हवे तसे वागवले, असा आरोप नाईक यांनी केला. तसेच, या प्रकरणाच्या चौकशीसाठी त्यांनी मुख्यमंत्री आणि महापालिका आयुक्तांना पत्र दिले आहे. ऑक्सिजन, औषधे आणि कोविड काळात सिडकोचा निधी दुसऱ्या शहरांमध्ये वापरल्याच्या मुद्द्यावरून नाईकांनी नाव न घेता पुन्हा एकदा उपमुख्यमंत्री एकनाथ शिंदे यांच्यावरही टीका केली.
वाशी येथे आज झालेल्या आढावा बैठकीत बोलताना नाईक यांनी, पाच वर्षे महापालिकेत लोकप्रतिनिधींची समिती नसल्यामुळे प्रशासनाला राबवले गेले आणि नवी मुंबईची जनता तहानलेली राहिली, हे नगरविकास विभागाचे अपयश आहे, असे म्हटले. कोविड काळात रबाळे एमआयडीसीमध्ये तयार केलेला ऑक्सिजन गॅस आणि रेमडेसिवीरसारखी महत्त्वाची औषधेही चोरून नेल्याचा गंभीर आरोप त्यांनी केला.

सिडकोलाही फटकारले
नाईक यांनी सिडकोवरही जोरदार टीका केली. नवी मुंबईतील शेतकऱ्यांच्या जमिनी घेतल्या असतानाही प्रकल्पग्रस्तांना मदत करण्याऐवजी सिडकोचा निधी मुंबई आणि ठाण्यात वापरला जात असल्याचा आरोप त्यांनी केला. तसेच, महापालिकेला मिळायला हवे असलेले भूखंड विकसकांच्या घशात घातले जात असल्याचेही त्यांनी सांगितले.

निवडणुकीनंतर ती १४ गावे बाहेर काढणार
याशिवाय, महापालिका निवडणुकीनंतर कल्याण तालुक्यातील नवी मुंबई महापालिकेत समाविष्ट झालेली १४ गावे पहिल्या सहा महिन्यांत बाहेर काढली जातील, अशी ग्वाही मुख्यमंत्र्यांनी दिल्याचे नाईक यांनी या वेळी सांगितले. या गावांच्या समावेशामुळे नवी मुंबईकरांवर सहा हजार कोटींचा भुर्दंड पडला आहे. तो असाच नवी मुंबईकरांवर टाकू देणार नाही, असे नाईक यांनी स्पष्ट केले.