ठाणे जिल्हा बँकेला उत्कृष्ट जिल्हा मध्यवर्ती सहकारी बँक पुरस्कार
विरार, ता. १९ (बातमीदार) ः नाबार्डच्या ४४व्या स्थापनादिन तसेच आंतरराष्ट्रीय सहकारिता वर्ष २०२५ निमित्त शनिवारी (ता. १९) ठाणे जिल्हा बँकेला उत्कृष्ट जिल्हा मध्यवर्ती सहकारी बँकेचा पुरस्कार मिळाला आहे. पुण्यातील यशदा येथे आयोजित कार्यक्रमात उत्कृष्ट कामकाज करणाऱ्या जिल्हा मध्यवर्ती सहकारी बँका या वर्गवारीत कोकण विभागातून ठाणे बॅंकेला आर्थिक वर्ष २०२३-२४ करिता हा पुरस्कार मिळाला आहे.
या कार्यक्रमाला प्रमुख पाहुणे म्हणून केंद्रीय सहकार व नागरी विमान राज्यमंत्री मुरलीधर मोहोळ, महाराष्ट्र राज्य सहकार विभागाचे प्रधान सचिव प्रवीण दराडे, नाबार्डचे उपप्रबंधक (निबंधक) गोवर्धन सिंह रावत, नाबार्ड पुणेचे मुख्य महाप्रबंधक रश्मी दराड, महाराष्ट्र राज्याचे सहकार आयुक्त दीपक तावरे यांचे हस्ते स्वीकारताना बँकेचे अध्यक्ष राजेंद्र जी. पाटील, बँकेचे मुख्य कार्यकारी अधिकारी श्रीकांत पठारे आदी मान्यवर उपस्थित होते.