म्हाडाच्या घरांसाठी
सहा दिवसांत ७,४२१ अर्ज
सकाळ वृत्तसेवा
मुंबई, ता. १९ : सर्वसामान्यांच्या घराचे स्वप्न पूर्ण करण्यासाठी म्हाडाच्या कोकण मंडळाने ५,२५७ घरांच्या विक्रीसाठी जाहीर केलेल्या लाॅटरीला चांगला प्रतिसाद मिळत आहे. अर्ज भरण्यास सुरुवात झाल्यापासून गेल्या सहा दिवसांत तब्बल सात हजार ४२१ जणांनी ऑनलाइन अर्ज भरला असून दोन हजार ४९९ जणांनी अनामत रक्कम भरली आहे.
म्हाडाच्या कोकण मंडळाने जाहीर केलेल्या पाच हजार २८५ घरांच्या लाॅटरीत अत्यल्प म्हणजे वार्षिक सहा लाखांपर्यंत उत्पन्न असलेल्या गटासाठी तब्बल चार हजार ८०२ घरे राखीव आहेत. तसेच, नऊ लाखांपर्यंत वार्षिक उत्पन्न असलेल्या अल्प उत्पन्न गटातील कुटुंबासाठी ४५५ घरे राखीव आहेत. या घरांसाठी ऑनलाइन अर्ज करण्याच्या प्रक्रियेला सोमवारपासून (ता. १४) सुरुवात झाली आहे. त्यानुसार आतापर्यंत आलेले अर्ज पाहता सर्वसामान्यांचा या लाॅटरीला चांगला प्रतिसाद मिळत असल्याचे स्पष्ट झाले आहे. या लाॅटरीसाठी १३ ऑगस्ट ही ऑनलाइन अर्ज करण्याची अंतिम मुदत आहे.