आठवर्षीय बालिकेवर
सावत्र बापाचा अत्याचार

कर्जतमधील संतापजनक घटना

कर्जत, ता. १९ : कर्जत तालुक्यातील शेलू गावात माणुसकीला काळिमा फासणारी घटना उघडकीस आली आहे. ५५ वर्षीय सावत्र बापाने आठवर्षीय मुलीवर वारंवार अत्याचार केल्याची धक्कादायक बाब उघडकीस आली आहे. याप्रकरणी नेरळ पोलिस ठाण्यात पोस्को कायद्यानुसार गुन्हा दाखल झाला असून आरोपीस अटक करण्यात आली आहे. या घटनेनंतर परिसरात संतापाची भावना आहे.

आरोपीचे लग्न झाले असून तो पत्नीपासून काही वर्षांपूर्वी विभक्त राहतो. त्याचवेळी घटस्फोट न घेताच तो तीन वर्षांपासून दुसऱ्या महिलेसोबत राहत होता. या महिलेला तिच्या पहिल्या पतीपासून आठवर्षीय मुलगी आहे. या मुलीवर आरोपीने २६ जून ते १८ जुलै २०२५ या कालावधीत पहाटेच्या सुमारास वारंवार गैरवर्तन केल्याचा आरोप आहे, अशी माहिती पोलिसांनी दिली. पीडित मुलीच्या आईने पहाटे त्याला रंगेहाथ पकडल्यानंतर नेरळ पोलिस ठाण्यात तक्रार दाखल केली. त्यानंतर पोलिसांनी आरोपीला अटक केल्याचे पोलिसांनी सांगितले. याप्रकरणी पोलिस निरीक्षक शिवाजी ढवळे यांनी तत्काळ कारवाई केली. उपविभागीय पोलिस अधिकारी विक्रम कदम यांनी तातडीने घटनास्थळी भेट देऊन संपूर्ण माहिती घेतली. आरोपीवर पोस्को कायद्यानुसार गुन्हा दाखल करण्यात आला आहे. पुढील तपास पोलिस उपनिरीक्षक भास्कर गच्चे हे करत आहेत.