भातशेतीला विम्याचे कवच
शेतकऱ्यांना ३१ जुलैची मुदत; कृषी विभागाचे आवाहन
सकाळ वृत्तसेवा
डोंबिवली, ता. २० : अवकाळी पावसामुळे शेतीचे मोठ्या प्रमाणात नुकसान होते. भातपिकाची लागवड आता झाली असून, अनेकदा परतीच्या पावसाने पिकांचे नुकसान होते. त्यामुळे शेतकरी अडचणीत सापडतो. दरम्यान, आता भातपिकाचे नुकसान झाले तरी शेतकऱ्यांना नुकसानभरपाई विमा स्वरूपात मिळणार आहे. भातशेतीला विम्याचे कवच मिळाले असून, कृषी विभागाने शेतकऱ्यांना पीक विमा काढण्याचे आवाहन अंबरनाथ तालुक्यात केले आहे. ३१ जुलैची मुदत असून, त्याआधी विमा काढून घ्यावा, अशी माहिती अंबरनाथ तालुका कृषी विभागाकडून शेतकऱ्यांना दिली आहे.

पावसाळ्यात पिकांची लागवड केल्यानंतर अवकाळी पाऊस, अतिवृष्टी, अल्पवृष्टी अशा नैसर्गिक संकटाचा सामना शेतकऱ्यांना करावा लागतो. नैसर्गिक आपत्तीमुळे तर कधी कीडरोगामुळे भात, नागली, उडीद पिकांचे नुकसान होते. शेतकऱ्यांनी आपल्या शेतातील पिकाचा विमा उतरवला असेल, तर कंपनीमार्फत विमा संरक्षित रक्कम शेतकऱ्यांना मिळू शकते. त्यामुळे जास्तीत जास्त शेतकऱ्यांनी आपले भात, नागली, उडीद या पिकांचा विमा ३१ जुलैपूर्वी उतरवावा, असे आवाहन शेतकऱ्यांना अंबरनाथ तालुका कृषी विभागाने केले आहे. तालुक्यात आतापर्यंत ८० टक्के भातलागवडीचे काम पूर्ण झाले आहे. लागवडीचे काम अंतिम टप्प्यात आल्याची माहिती कृषी विभागाने दिली आहे.

विमा योजनेत सहभागी होण्यासाठी कर्जदार शेतकऱ्यांना कर्ज देणाऱ्या बँकेमार्फत विम्याचे संरक्षण मिळणार आहे. तर बिगर कर्जदार शेतकऱ्यांना आपले सरकार केंद्रात पीक विम्याचे संरक्षण मिळणार आहे. त्यासाठी शेतकऱ्यांना फार्मर आयडी, सातबारा, बँकेचे पासबुक, आधार कार्ड, सामायिक खातेदार संमतीपत्र, पीक पेरणी स्वयंघोषणापत्र आवश्यक असणार आहे.

ऊन-पावसाचा खेळ
नैसर्गिक संकटांना बळीराजाला तोंड द्यावं लागत आहे. यामुळे शेतकऱ्यांनी पीक विमा काढून पिकांना संरक्षण देण्याची गरज निर्माण झाली आहे. कृषी विभागाच्या पीक विम्याच्या आवाहनाला शेतकऱ्यांचा प्रतिसाद कसा मिळतो हे पाहावे लागेल.

असा असेल विमा हप्ता
पीक जोखीम स्तर (टक्केवारी ) संरक्षित रक्कम (प्रति हेक्टर ) हप्ता दर (टक्केवारी ) हप्ता रक्कम रुपये (प्रति हेक्टर)
भात ७० ६१,००० ०.७५ ४५७.५०
नाचणी ७० ४०,००० ०.२५ १००.००