प्राचीन शिवमंदिरात कावड यात्रा
भाविकांची गर्दी !
अंबरनाथ, ता. २० (वार्ताहर) : हिंदू परंपरेनुसार पवित्र श्रावण महिना सुरू झाला आहे. श्रावण महिन्यानिमित्त कावड यात्रेलाही सुरुवात झाली आहे. बदलापूर येथील कोंडेश्वर मंदिर येथे भगवान शिवशंकर यांचे मंदिर आहे. मागील अनेक वर्षांपासून येथून श्रावण महिन्यात कावड यात्रेचे आयोजन केले जाते. यंदाही युवावाहिनी फाउंडेशनच्या माध्यमातून कावड यात्रेचे आयोजन करण्यात आले आहे. यात्रेत सहभागी झालेल्या भाविकांसाठी आयोजक बबलू सिंग यांनी कल्याण बदलापूर मार्गावर लादीनाका येथे विशेष आयोजन केले होते. या वेळी पदयात्रेत सहभाग घेणाऱ्या प्रत्येक भाविकाला प्रसाद व दूधवाटप करण्यात आले. त्याचबरोबर मोफत वैद्यकीय सेवा व रुग्णवाहिका उपलब्ध केली होती. या वेळी भाविकांच्या मनोरंजनासाठी खास कलाकार उपस्थित होते. कोंडेश्वर मंदिर येथून या कावड यात्रेला सुरुवात झाली, तर अंबरनाथमधील प्राचीन शिवमंदिरात याचा समारोप झाला.