माणगावात आढळले दुर्मिळ खवले मांजर
प्राणिमित्रांच्या मदतीने वन विभागाकडून जीवदान
माणगाव, ता. २० (वार्ताहर) ः माणगावमधील खांदाड गावात दुर्मिळ असे खवले मांजर आढळून आले. या वेळी प्राणिमित्रांच्या सतर्कतेमुळे तसेच वन विभागाच्या मदतीने त्‍याला पुन्‍हा जंगलात सुखरूप सोडण्यात आले आहे.
शुक्रवारी (ता. २०) गावातील एका वस्तीजवळ गावकऱ्यांना एक अनोळखी विचित्र वन्यजीव दिसून आला. त्यानंतर गावकऱ्यांनी तत्‍काळ वन्यजीव अभ्यासक शंतनु कुवेसकर यांना तातडीने बोलावून घेतले. या वेळी कुवेसकर यांनी हा वन्यप्राणी दुर्मिळ असे खवले मांजर असल्याचे सांगितले. तसेच वन विभागालादेखील याची माहिती देण्यात आली. या वेळी खांदाड गावच्या सर्व तरुणांना व ग्रामस्थांना खवले मांजराची ओळख पटवून देत शंतनु कुवेसकर यांनी जनजागृतीपर मार्गदर्शन केले. खांदाड गाव व आजूबाजूच्या परिसरात खवले मांजर कायमस्वरूपी राहण्यायोग्य कोणताही नैसर्गिक अधिवास उपलब्ध नाही. त्यामुळे हे खवले मांजर सध्याच्या पूरस्थितीमध्ये काळ नदीच्या पूर प्रवाहात पश्चिमेकडील घनदाट जंगलाच्या पट्ट्यातून कुठूनतरी वाहून आल्याची शक्यता वन्यजीव अभ्यासक कुवेसकर यांनी व्‍यक्‍त केली आहे, तर खांदाड गावच्या सर्व तरुणांनी व ज्येष्ठ ग्रामस्थांनीदेखील अशा प्रकारचा वन्यजीव गावात आयुष्यात पहिल्यांदाच पाहिला असल्याचे सांगितले. या वेळी सशक्त व तंदुरुस्त असलेले खवले मांजर त्वरित वन विभागाकडे सुपूर्द करण्यात आले. त्यानंतर रात्री वन विभागाचे उपवनसंरक्षक शैलेंद्रकुमार जाधव व सहाय्यक उपवनसंरक्षक रोहित चौबे यांच्या मार्गदर्शनाखाली माणगावचे वन परिक्षेत्र अधिकारी प्रशांत शिंदे यांच्या सूचनेप्रमाणे उपस्थित वनपाल डी. एस. सुभेदार, वनरक्षक वैशाली भोर, पवन चौधरी, संतोष पिंगळा, राणी लिंबोरे, वाहनचालक विवेक जाधव यांच्यामार्फत पुढील योग्य ती कार्यवाही करून खवले मांजरास सुरक्षित ठिकाणी त्याच्या नैसर्गिक अधिवासात सोडण्यात आले.
........................
सर्वाधिक तस्करी होणारा प्राणी
इंडियन पँगोलिन म्हणजेच खवले मांजर हा जीव जगातील सर्वात जास्त तस्करी होणारा प्राणी आहे. हा प्राणी अतिसंवेदनशील असतो, वन्यजीव संरक्षण कायद्यात त्याला सर्वोच्च दर्जाचे स्थान तसेच सर्वोच्च दर्जाचे संरक्षण प्राप्त आहे. वन्यजीवाला कोणत्याही प्रकारची हानी न पोहोचवता खांदाड गावच्या ग्रामस्थांनी त्याचे रक्षण करून वन्यजीव संरक्षणाचे अतिशय स्तुत्य कार्य केल्याचे उपवनसंरक्षक शैलेंद्रकुमार जाधव यांनी सांगितले.
.........................
निसर्गाचा समतोल राखते
खवले मांजराचे निसर्गात अनन्यसाधारण महत्त्व असून, ते नैसर्गिक परिसंस्थांचा एक महत्त्वाचा भाग आहे. नैसर्गिक कीटक नियंत्रक आणि अधिवास सुदृढ राखण्यासाठी निसर्गात मोलाचे काम खवले मांजर करते, असे वन्यजीव अभ्यासक शंतनु कुवेसकर यांनी सांगितले.