विद्याभवनमध्ये राष्ट्रीय विज्ञानकथादिन साजरा
नेरुळ, ता. २० (बातमीदार) ः पुणे विद्यार्थी गृहाच्या नेरूळ येथील विद्याभवन शिक्षण संकुलात मराठी विज्ञान परिषदेचे नवी मुंबई विभाग अध्यक्ष डॉ. किशोर कुलकर्णी यांच्या प्रमुख उपस्थितीत राष्ट्रीय विज्ञानकथादिन साजरा करण्यात आला. ज्येष्ठ भारतीय शास्त्रज्ञ डॉ. जयंत नारळीकर यांचा १९ जुलै रोजी जन्मदिवस असल्यामुळे हा राष्ट्रीय विज्ञानकथा दिवस म्हणून साजरा केला जातो.
डॉ. किशोर कुलकर्णी यांनी वाचन आणि विज्ञान विषयावर विद्यार्थ्यांशी संवाद साधला. संभव-असंभव या विज्ञानकथेचे त्यांनी सादरीकरण केले. सखोल शास्त्रशुद्ध विचार आणि तत्त्व डोळ्यासमोर ठेवून विज्ञान कथा गुंफल्या जातात. या कथा वैज्ञानिक दृष्टिकोन रुजवतात. या वेळी डॉ. कुलकर्णी यांनी आयझ्याक असीमव तसेच अनेक भारतीय आणि परदेशी विज्ञानकथा लेखकांचा विद्यार्थ्यांना परिचय करून दिला. विद्यार्थ्यांना ग्रंथालयातील विज्ञानकथा वाचून नियमित नवीन उपक्रम सुचवले आणि विद्यार्थ्यांच्या प्रश्नांची उत्तरे दिली. याप्रसंगी समन्वयक पांडुरंग मुळीक, विज्ञान शिक्षक दत्तात्रय आटपाडकर, आदर्श शिक्षक अविनाश कुलकर्णी उपस्थित होते.