साहित्य चावडीवर ‘संगतीचो शिमगो’, ‘वूडन हाउस मर्डर’ कादंबऱ्यांचे प्रकाशन
विरार, ता. २० (बातमीदार) ः साहित्य चावडीच्या ७२व्या पुष्पात कविवर्य विक्रांत केसरकर यांचे ‘संगतीचा शिमगो’ आणि संगीतकार लेखक प्रकाश पाटील यांची ‘वूडन हाउस मर्डर’ या दोन कादंबऱ्यांचे प्रकाशन विवा महाविद्यालयाच्या उपप्राचार्या प्राजक्ता परांजपे यांच्या हस्ते करण्यात आले.
‘संगतीचा शिमगो’ या कादंबरीत कोकणचं नैसर्गिक सौंदर्य लपलं आहे. तसेच साहित्यिक प्रकाश पाटील यांची ‘वूडन हाउस मर्डर’ ही कादंबरी अमेरिकेतील कोलंबिया विद्यापीठातून‌ प्रवास करीत भारतात येते. मध्ये बरेच प्रसंग घडतात. शेवटपर्यंत वाचकाला खिळवून ठेवणारी अशी ही कादंबरी आहे.
स्त्रीवादी कवयित्री संगीता अरबुने या वर्षा कविसंमेलनाच्या अध्यक्षपदी विराजमान होत्या. कविता ही हृदयातून आली पाहिजे, असं म्हणत अरबुने यांनी सर्व कवींना मार्गदर्शन केले. सुसंवादक वीरेंद्र पाटील व शिल्पा परुळेकर पै यांनी सुसंवाद साधत निवेदन केले. माजी आमदार हितेंद्र ठाकूर यांच्या मार्गदर्शनाखाली आणि अजीव पाटील यांच्या सहकार्याने विवा काॅलेज येथे साहित्य चावडीवर पुस्तक प्रकाशन समारंभ झाला. कार्यक्रम यशस्वी करण्यासाठी दीपाली जाधव, सुरेखा कुरकुरे, विक्रांत केसरकर, हरिश्चंद्र मिठबावकर यांनी मेहनत घेतली. ऋणनिर्देश मधुकर तराळे यांनी व्यक्त केले.