कासा, ता. २० (बातमीदार) : डहाणूतील आंबिवली परिसरात शनिवारी (ता. १९) संध्याकाळी भीषण अपघातात कार उलटल्याने एका तरुणीचा मृत्यू, तर सहा जणी जखमी झाल्या आहेत. त्याच्यातून दोन तरुणींना प्राथमिक उपचार करून घरी पाठवले, तर चार जणी रुग्णालयात उपचार घेत आहेत. चिखलमय रस्त्यामुळे वाहनावरील चालकाचे नियंत्रण सुटल्याने गाडीने झाडाला जोरदार धडक दिली. त्यानंतर कार उलटल्याचे सांगण्यात येत आहे.

अच्छाड येथील कारखान्यांत ग्रामीण भागातील अनेक तरुण-तरुणी रोजगारासाठी जातात. त्यांना कामावर नेण्यासाठी, तसेच घरी परत सोडण्यासाठी वाहनाची व्यवस्था करण्यात आली आहे. शनिवारी सायंकाळी ७ वाजण्याच्या सुमारास निकणे सायवन देसक यांच्या इको गाडीमधून सारणी-आंबिवली मार्गावरून सात तरुणी प्रवास करत होत्या. त्या सर्व जणी अच्छाड येथे काम आटोपून घरी परतत होत्या. आंबिवलीतील सोमनपाडा येथे इको कारच्या (क्र. एमएच ४८ बीटी ३४५५) भीषण अपघातात अंजली रघुनाथ काकरा (वय २३) हिचा मृत्यू झाला असून, सहा मुली गंभीर जखमी झाल्या आहेत. दुर्घटनेनंतर स्थानिक नागरिकांनी तत्परता दाखवत जखमींना कासा येथील उपजिल्हा रुग्णालयात दाखल केले, मात्र काहींची प्रकृती गंभीर असल्याने त्यांना वेदांत हॉस्पिटलमध्ये पुढील उपचारासाठी हलवण्यात आले आहे.

रस्त्यावरील चिखल आणि रस्ता अत्यंत खराब झाल्याचे अपघाताचे संभाव्य कारण सांगितले जात आहे. वाहनचालकाचे गाडीवरील नियंत्रण सुटल्याने ती झाडावर आदळल्याचे प्रत्यक्षदर्शींनी सांगितले.