नवी मुंबई, ता. २० (वार्ताहर) : अल्पवयीन मुलीवर लैंगिक अत्याचार करणाऱ्या एकास बेलापूर येथील अतिरिक्त जिल्हा व सत्र न्यायाधीश पी. ए. साने यांनी १० वर्षे सश्रम कारावास आणि दोन हजार रुपये दंडाची शिक्षा ठोठावली आहे. मोनल रमेश वाघेला (२६) असे आरोपीचे नाव असून, मे २०२३मध्ये त्याने पीडित मुलीवर अत्याचार केला होता.
मोनल वाघेला या तरुणाने वाशीतील जुहू गावात राहणाऱ्या १७ वर्षीय पीडित मुलीवर जबरदस्तीने लैंगिक अत्याचार केले होते. त्या वेळी पीडितेच्या आईने दिलेल्या तक्रारीवरून वाशी पोलिसांनी मोनल वाघेला याच्याविरोधात बलात्कारासह पोक्सोअंतर्गत गुन्हा दाखल करून अटक केली होती. वाशी पोलिस ठाण्याचे तत्कालीन वरिष्ठ निरीक्षक शशिकांत चांदेकर यांच्या मार्गदर्शनाखाली सहाय्यक पोलिस निरीक्षक एस. डी. मारोडे यांनी या प्रकरणाचा तपास पूर्ण करून आरोपीविरोधात बेलापूर सत्र न्यायालयात दोषारोपत्र दाखल केले होते.
खटल्याच्या सुनावणीदरम्यान सरकार पक्षातर्फे आठ साक्षीदार तपासण्यात आले. त्यामध्ये पीडित मुलगी, वैद्यकीय अधिकारी तसेच तपास अधिकारी यांची साक्ष महत्त्वाची ठरली. त्यानंतर शनिवारी (ता. १९) मोनलला १० वर्षे सश्रम कारावास आणि दोन हजार रुपये दंड व दंड न भरल्यास आणखी तीन महिन्यांची सक्त मजुरीची शिक्षा ठोठावली आहे.

मुलीस नुकसानभरपाई देण्याचे निर्देश
न्यायालयाने दिलेल्या आदेशानुसार, मोनल वाघेला २५ मे २०२३ पासून तुरुंगात असल्याने त्याला शिक्षा अवधीत सवलत मिळणार आहे. तसेच दंड रकमेतील दीड हजार रुपये पीडित मुलीस नुकसानभरपाई म्हणून देण्याचे व शिल्लक ५०० रुपये सरकारकडे जमा करण्याचे निर्देश दिले आहेत. मात्र ही रक्कम अपुरी असल्याने ठाणे जिल्हा विधी सेवा प्राधिकरणांतर्गत मुलीस नुकसानभरपाई निश्चित करण्याचे निर्देश दिले आहेत.