गरीब गरजू विद्यार्थ्यांच्या पंखात बळ भरणारे मन रे फाउंडेशन
शंभर विद्यार्थ्यांना ६२ लाखांची शैक्षणिक मदत
पालघर, ता. २० (बातमीदार) ः विद्यार्थ्यांना शिकण्याची इच्छा असते, मात्र आर्थिक अडचणीमुळे शैक्षणिक शुल्क भरता येत नाही. पालघर जिल्ह्यातील अशा मुलांसाठी मन रे फाउंडेशन आशेचा किरण ठरला आहे. नुकतीच त्यांनी जिल्ह्यातील शंभर विद्यार्थ्यांना सुमारे ६२ लाख रुपयांची शैक्षणिक मदत केली आहे. व पुढील उच्च शिक्षणासाठी लागणारी मदतही फाउंडेशन करेल, तुम्ही शिकत राहा, असा विश्वास फाउंडेशनच्या अध्यक्षा मानसी दलाल यांनी विद्यार्थ्यांना दिला.
मन रे फाउंडेशन गेल्या चार वर्षांपासून पालघर जिल्ह्यातील खेडापाड्यातील विशेषतः जिल्हा परिषद शाळेतील विद्यार्थ्यांना दरवर्षी शैक्षणिक साहित्य देते. त्यांच्या या उपक्रमामुळे जिल्हा परिषदेच्या अनेक शाळांतील विद्यार्थीसंख्येत वाढ झाल्याचे शिक्षकांनी दलाल यांना सांगितले, मात्र या वस्तू देताना विद्यार्थ्यांची ७५ टक्क्यांपेक्षा जास्त हजेरी आवश्यक असल्याचा नियम त्यांनी केला आहे. आठवीपासून विद्यार्थिनी आपलं शिक्षण सोडत असल्याचे त्यांच्या लक्षात आल्यावर यामागचं कारण शोधलं असता अनेकांना मासिक पाळीदरम्यान सॅनिटरी पॅड नसल्याने मुली शाळेत येणे टाळतात, असे समोर आले. याकरिता त्यांनी मुलींना वर्षभराचे किट दिले, असेही दलाल यांनी सांगितले.
मन रे फाउंडेशनच्या माध्यमातून त्यांनी २०२० पासून पालघर जिल्ह्यातील गरजू विद्यार्थ्यांना मदतीचा हात देण्यास सुरुवात केली. सहा हजारांपासून ते साधारण दोन ते अडीच लाख रुपयापर्यंतचे विद्यार्थ्यांचे शैक्षणिक शुल्क त्यांच्या संस्थेमार्फत भरले जाते.
पालघर येथील जेनेसिस औद्योगिक वसाहतीमध्ये विद्यार्थ्यांना धनादेश वितरणाचा कार्यक्रम पार पडला. या वेळी मन रे फाउंडेशनच्या अध्यक्षा मानसी दलाल, गौरव दलाल, उमरोळीचे सरपंच प्रभाकर, पाटील, दांडेकर महाविद्यालयाचे क्रीडा संचालक संतोष चुरी, राजेशमणी त्रिपाठी व विद्यार्थी त्यांचे पालक आदी उपस्थित होते.