पनवेलमध्ये रस्त्यांची समस्या गंभीर
अपघाताची शक्यता; अभियंत्यांवर कारवाईची मागणी
नवीन पनवेल, ता. २० (बातमीदार) ः पनवेल महापालिका हद्दीतील सर्व रस्त्यांची चाळण झाली आहे. महापालिकेने प्रभागनिहाय चार कंत्राटदारांची नियुक्ती करून कोट्यवधी रुपयांच्या रस्त्याच्या दुरुस्तीचे काम त्यांच्याकडे सोपवले आहे, मात्र कोट्यवधी रुपये खर्चूनही परिसरातील रस्‍त्‍यांवर खड्ड्यांचे साम्राज्य पसरले आहे. यामुळे प्रहार जनशक्ती पक्षाने महापालिका प्रशासनाला निवेदन देऊन रस्‍त्याची दुरुस्‍ती करण्यात यावी, अशी मागणी केली आहे. त्‍यांच्या तक्रारीनंतर पालिकेचे अभियंता व ठेकेदारांनी परिसराची पाहणी करत काम पूर्ण करण्याचे आश्वासन दिले आहे.
मागील काही वर्षांपासून पनेवल शहराचा विकास झाला आहे. महापालिका अस्‍तित्‍वात आल्यानंतर शहरातील रस्‍त्‍यांची परिस्‍थिती बदलेल, अशी आशा व्‍यक्‍त केली गेली, मात्र रस्‍त्‍यांची परिस्‍थिती जैसे थे असल्याने नाराजी व्‍यक्‍त केली जात आहे. पालिकेच्या ठेकेदारांकडून मोठ्या प्रमाणात रस्‍त्‍याची दुरुस्‍ती करण्यात येत आहे. मागील दोन वर्षांत लाखो रुपयांचा निधी खर्च करून शहरातील रस्‍त्‍यांची कामे करण्यात आली, मात्र हे काम निकृष्ट दर्जाचे असल्याने यंदाच्या पावसाळ्यात शहरातील अनेक रस्‍त्‍यांवर मोठमोठे खड्डे पडले आहेत. पनवेल रेल्‍वेस्‍थानकाबाहेरदेखील रस्‍त्‍यांची खड्ड्यांमुळे चाळण झाली आहे. विशेष म्‍हणजे पुन्‍हा पैसे खर्च करून प्रत्येक प्रभागात रिसर्फेसिंग कामाचे कार्यादेश काढण्यात आले आहेत. याला प्रहार जनशक्‍ती पक्षाने विरोध केला आहे. रस्ते दुरुस्तीचे कोट्यवधींचे कंत्राट दिल्यानंतर याची गरजच नव्हती, असा सवाल प्रहार जनशक्‍ती पक्षाचे सुनील शिरिषकर यांनी केला आहे. जनतेच्या पैशांची उधळपटी करणाऱ्या आणि बेजबाबदारपणे वागणाऱ्या प्रभागातील कनिष्ठ अभियंत्यांवर शिस्तभंगाची कारवाई करावी, संबंधित ठेकेदाराला काळ्या यादीत टाकावे, अशी तक्रारही अभियंत्यांकडे करण्यात आली आहे.
..................
कोट
पनवेल महापालिका हद्दीत बांधकाम विभागाने खराब रस्ते, खड्डे बुजवण्यासाठी प्रभागनिहाय कोट्यवधी रुपयांचे कंत्राट देऊनही रस्त्यांची दुरवस्था झाली आहे. यास जबाबदार असणाऱ्या ठेकेदाराला काळ्या यादीत टाकून अभियंत्यांवर शिस्तभंगाची कारवाई करावी.
-सुनील शिरिषकर, जिल्हा उपाध्यक्ष, रायगड प्रहार जनशक्ती पक्ष
...............
रस्‍त्‍यांवर फार मोठ्या प्रमाणात खड्डे नाहीत. कामोठे भागात काही ठिकाणी गॅसलाइनची कामे झाली आहेत; त्यामुळे रस्ता खराब झाला आहे. त्यात पावसाळा लवकर सुरू झाल्याने अडचणी आल्या. आता तात्पुरती दुरुस्ती करत आहोत. वर्क ऑर्डर तशी दिलेली आहे.
- संजय कटेकर, शहर अभियंता, पनवेल महापालिका
...............