अल्पवयीन मुलाच्या
अंगावर सोडले श्वान
मालकावर गुन्हा दाखल
मुंबई/चेंबूर, ता. २० (बातमीदार) ः रिक्षात अल्पवयीन मुलाला पाळीव श्वानाची भीती दाखवत माथेफिरूने त्याच्या अंगावर श्वान सोडले. डोळ्यादेखत श्वान मुलाचे लचके तोडून त्याचा पाठलाग करीत असताना श्वानमालकाने मात्र हसतहसत त्याचा व्हिडिओ चित्रित केला. या घटनेत मुलगा गंभीर जखमी झाला असून, मानखुर्द पोलिसांनी श्वानमालक मोहम्मद सोहेल हसन खान (वय ४३) याच्याविरुद्ध गुन्हा नोंदवण्यात आला आहे. दरम्यान, या घटनेचा व्हिडिओ समाजमाध्यमांवर व्हायरल झाला आहे.
मानखुर्दच्या म्हाडा कॉलनीतील रहिवासी हमजा हलीम जमिल खान (३४) यांचा मुलगा हमजा (१२) गुरुवारी (ता. १७) रात्री १० वाजता परिसरात खेळत असताना एका रिक्षात बसला. त्याच रिक्षात मोहम्मद त्याचा पाळीव श्वान घेऊन बसला. तो श्वान मुलावर सोडत त्याला घाबरवताना हसत होता. त्यातच श्वानाने हमजाचा चावा घेतला. श्वानाकडून हल्ला सुरू असताना, मुलाने तेथून पळ काढला. आक्रमक झालेला श्वान त्याच्या मागे धावला. त्यात मुलगा जखमी झाला असून त्याला मानसिक धक्का बसला. मुलाने घरी जाऊन पालकांना हा प्रकार सांगितला. या हल्ल्याचे व्हिडिओ पाहून कुटुंबीयांनाही धक्का बसला. व्हिडिओत आजूबाजूच्या काही लोकांचा हसण्याचा आवाज येत आहे. तक्रारीवरून मोहम्मदविरुद्ध गुन्हा नोंदवत त्याला अटक केली. तसेच, त्याला नोटीस देऊन सोडण्यात आले आहे.