मांडा आरोग्य केंद्राची दुरवस्था
टिटवाळा, ता. २२ (वार्ताहर) : कल्याण-डोंबिवली महापालिकेच्या टिटवाळा पश्चिमेतील मांडा परिसरातील आरोग्य केंद्राची जुनी इमारत जीर्ण झाली असून, मोडकळीस आली आहे. तसेच सोयीसुविधांचा अभाव, वैद्यकीय कर्मचाऱ्यांच्या कमतरतेमुळे रुग्णांना गैरसोयींचा सामना करावा लागत आहे. हे आरोग्य केंद्र जिल्हा परिषदेच्या जुन्या इमारतीत सुरू आहे. त्यामुळे नागरिकांनी पालिकेवर आरोग्यसेवेकडे दुर्लक्ष केल्याचा आरोप केला आहे

मांडा टिटवाळा परिसरात झपाट्याने लोकसंख्या वाढत असूनही आवश्यक आरोग्यसेवा उपलब्ध नाही. परिणामी, छोट्या-मोठ्या आजारांसाठी नागरिकांना खासगी रुग्णालयांत जावे लागत आहे. विशेषतः गर्भवती महिला, बालकांचे लसीकरण तसेच श्वानदंश झाल्यावर लसीसाठी कल्याणच्या रुक्मिणी रुग्णालयात धाव घ्यावी लागते. महापालिकेने हे केंद्र सुरू केले असले तरी जमिनीचा हस्तांतरणाचा मुद्दा प्रलंबित असल्यामुळे विकासकामे अडकून पडली आहेत. मांडा टिटवाळा येथे जिल्हा परिषदेचे आरोग्य केंद्र होते; मात्र महापालिका अस्तित्वात आल्यानंतर याच केंद्रात महापालिका प्रशासनाने आरोग्य सुविधा सुरू केली; मात्र हे करत असताना महापालिकेने येथील रुग्णालयाची जागा मात्र हस्तांतरित केली नाही. त्यामुळे आजही येथील अनेक बाबी दुरुस्ती करताना, तसेच त्याबाबतचे निर्णय करताना अडचणी येत आहेत २०१० ते २०१५ दरम्यान उपमहापौर बुधाराम सरनोबत यांनी नवीन रुग्णालयासाठी ३५ लाखांचा निधी मंजूर करून घेतला होता, परंतु जागा महापालिकेच्या नावे नसल्याने तो निधी वापरता आला नाही. तसेच मंजूर झालेला निधीदेखील दुसरीकडे वळविण्यात आला.

सध्या या केंद्रात एक पुरुष व एक महिला डॉक्टर, चार परिचारिका, एक लेब असिस्टंट, एक फार्मासिस्ट, एक अटेंडंट आणि १६ आशा सेविका कार्यरत आहेत. दररोज ७०-८० रुग्ण येथे येतात; मात्र केंद्राची स्थिती अत्यंत बिकट आहे. इमारतीचे छत गळते, शौचालये नादुरुस्त आणि घाणीत भरलेली आहेत. संरक्षक भिंतीला भगदाड पडले असून, मोकाट जनावरांचा मुक्त वावर सुरू आहे. तसेच आरोग्य केंद्रातील अपुरी जागा व वैद्यकीय आरोग्य आधिकाऱ्याची कमतरता, औषधांचा तुटवडा यामुळे येथे उपचारासाठी येणारे रुग्ण त्रस्त असतात.

नवीन रुग्णालयासाठी जमीन आरक्षित
नवीन रुग्णालयासाठी महापालिकेने जमीन आरक्षित केली आहे, मात्र त्यावर अद्याप कोणतेही ठोस पाऊल पडलेले नाही. नागरिकांचे म्हणणे आहे की, साथीच्या आजारांवेळी हा विषय चर्चेत येतो, पण नंतर पुन्हा दुर्लक्षित केला जातो. याप्रकरणी विचारले असता महापालिका आरोग्य अधिकारी डॉ. दीपा शुक्ला यांनी आरोग्य केंद्रात अडचणी असल्याचे मान्य केले. त्यांनी स्वतः भेट देऊन पाहणी केल्याचे सांगत, “संबंधित विभागाला सूचना दिल्या असून, लवकरच तातडीने उपाययोजना केली जाईल,” असे आश्वासन दिले.

कर्मचारी तुटवडा
पद संख्या
पुरुष डॉक्टर १
महिला डॉक्टर १
नर्सेस ४
लॅब असिस्टंट १
फार्मासिस्ट १
अटेंडंट १
आशा सेविका १६