जनसुरक्षा विधेयकाविरोधात काँग्रेसची निदर्शने
वाडा, ता. २२ (बातमीदार) ः तालुका काँग्रेसच्या वतीने सोमवारी (ता. २१) वाडा बसस्थानकासमोर जनसुरक्षा विधेयकाविरोधात निदर्शने करण्यात आली. या विधेयकास मंजुरी देऊ नये, अशा मागणीचे निवेदन तहसीलदारांमार्फत राज्यपालांना पाठविण्यात आले.
संविधानिक मूलभूत अधिकारांचा गळा घोटणारा जनसुरक्षा कायदा महाराष्ट्र सरकारने अधिवेशनामध्ये नुकताच पास केला आहे. सरकारच्या विरोधात बोलतील, त्या पक्ष संघटनेतील कार्यकर्त्यांना विनाचौकशी जेलमध्ये टाकण्याचा अधिकार या जनसुरक्षा कायद्याने सरकारला मिळाला आहे. पुरोगामी, शेतकरी, कामगार संघटना यांना संपवण्यासाठीच सरकार या कायद्याचा वापर करण्याची दाट शक्यता असल्याचे काँग्रेसचे जिल्हा अध्यक्ष प्रफुल पाटील यांनी सांगितले.
या वेळी काँग्रेसचे जिल्हाध्यक्ष प्रफुल पाटील, तालुका अध्यक्ष दिलीप पाटील, मीडिया सेल जिल्हाध्यक्ष गणेश बराठा, शहराध्यक्ष सुशील पातकर, महिला तालुकाध्यक्ष साक्षी आगिवले, विशाखा पाटील, भारती सपाटे, कैलास पाटील, जयवंत पाटील, गिरीश पाटील, स्वप्नील ठाकरे आदींसह कार्यकर्ते उपस्थित होते.