कामगाराच्या मृत्यूप्रकरणी हॉटेलमालक अटकेत
हलगर्जी केल्याचा ठपका

उल्हासनगर, ता. २२ (वार्ताहर) : इमारतीचा सज्जा कोसळून कामगाराचा मृत्यू झाल्याप्रकरणी संबंधित हॉटेलमालक महेश साधवानी याला अटक करण्यात आली आहे. रविवारी सायंकाळी घडलेल्या या घटनेने संपूर्ण परिसरात खळबळ उडाली होती.
या दुर्घटनेत रावसाहेब ननावरे हे कामगार गंभीर जखमी होऊन जागीच ठार झाले होते. अपघातानंतर हॉटेलमालक महेश साधवानी घटनास्थळावरून फरार झाला होता; मात्र मध्यवर्ती पोलिसांनी याप्रकरणी गंभीर दखल घेत गुन्हा दाखल केला आणि तपासाच्या अनुषंगाने साधवानीला अटक केली. त्याच्यावर हलगर्जी व निष्काळजीमुळे मृत्यू असा ठपका ठेवण्यात आला आहे. उल्हासनगर महापालिकेने या इमारतीच्या जर्जर स्थितीचा विचार करून पूर्वीच स्ट्रक्चर ऑडिट करून घेण्याच्या सूचना दिल्या होत्या. यासाठी लेखी नोटीस बजावण्यात आली होती; मात्र इमारतीचे ऑडिट न करता थेट दुरुस्तीचे काम सुरू करण्यात आले होते. कोणतीही अधिकृत मंजुरी न घेता आणि संरचनात्मक सुरक्षिततेची खात्री न करता काम सुरू केल्यामुळेच ही दुर्घटना घडल्याचा आरोप करण्यात येत आहे.