सफाई कामगारांच्या लढ्याला यश
वाटाघाटीनंतर सर्व मागण्या मान्य; प्रस्तावित संप मागे
सकाळ वृत्तसेवा
मुंबई, ता. २२ : पालिकेतील सफाई कामगारांच्या आंदोलनाला अखेर यश आले आहे. वाटाघाटीनंतर पालिकेने मंगळवारी (ता. २२) कामगारांच्या सर्व मागण्या मान्य केल्या आहेत. पालिका आयुक्त भूषण गगराणी आणि कामगार संघटनांमध्ये सोमवारी (ता. २८) या मागण्यांबाबत औपचारिक करार होणार आहे. त्यामुळे २३ जुलैपासूनचा प्रस्तावित संप मागे घेण्यात आला आहे तसेच सोमवारी कामगारांचा विजयी मेळावा होणार आहे.

पालिकेच्या घनकचरा विभागातील खासगीकरणाविरोधात कामगारांच्या सर्व संघटनांनी आक्रमक होत संपाचा इशारा दिला होता. त्याआधी कामगारांनी आंदोलन करून प्रशासनाचे लक्ष वेधले होते. त्यानंतर मुख्यमंत्री देवेंद्र फडणवीस यांच्या हस्तक्षेपामुळे मागण्यांबाबत वाटाघाटींना वेग आला. त्यांच्या निर्देशानुसार मंत्री गिरीश महाजन यांनी आझाद मैदानावरील आंदोलनस्थळीही भेट दिली. यानंतर मुख्यमंत्री आणि कामगार नेत्यांमध्ये विधान भवनमध्ये चर्चा झाली. या चर्चनंतर महापालिका आयुक्त भूषण गगराणी आणि म्युनिसिपल कामगार ॲक्शन कमिटी यांच्यात निर्णायक बैठक झाली. या बैठकीत कामगार नेते कपिल पाटील यांच्या नेतृत्वाखाली सुरेश ठाकूर, विजय कुलकर्णी, अशोक जाधव, रमाकांत बने, वामन कविस्कर, मिलिंद रानडे, रंगा सातवसे, बाबा कदम, देवी गुजर, प्रकाश जाधव, शेषराव राठोड आणि प्रफुल्लता दळवी यांनी सहभाग घेतला. यामध्ये कामगारांच्या सर्व मागण्या मान्य करण्यात आला असून, याबाबत येत्या सोमवारी करार केला जाणार आहे. त्यामुळे कामगारांचा २३ जुलैचा प्रस्तावित संप मागे घेण्यात आला असून, करारानंतर कामगारांचा विजयी मेळावा होणार असल्याची माहिती संघर्ष समितीचे समन्वयक वामन कविस्कर व रमाकांत बने यांनी दिली.

कामगारांचा मोठा विजय
पालिका कामगारांचा गेल्या दशकातील सर्वात मोठा विजय आहे, अशी प्रतिक्रिया कामगार नेत्यांनी या वेळी दिली तसेच या वेळी मुख्यमंत्री देवेंद्र फडणवीस, आयुक्त भूषण गगराणी आणि समाजवादी नेते कपिल पाटील यांचे आभार मानण्यात आले.
..........
या मागण्या मान्य
- एकही पद कमी न करता सर्व पदे कायम ठेवण्यात येणार
- कंत्राटी कामगारांना कायम करण्याचा निर्णय
- लाड-पागे समितीच्या शिफारशींनुसार कार्यवाही
- नवीन निविदा प्रक्रियेत कामगारांच्या हितांचे संरक्षण