टोकावडे, ता. २२ (बातमीदार) : मुरबाड तालुक्यातील वैशाखरे, पेंढरी व परिसरातील ४०-५० विद्यार्थी शिवळे कॉलेज व टोकावडे हायस्कूलमध्ये शिक्षण घेतात. मुरबाड–पेंढरी बस सेवा बंद झाल्याने विद्यार्थ्यांना त्रास सहन करावा लागत आहे. हा त्रास टाळण्यासाठी मुरबाड-पेंढरी बससेवा पूर्ववत करण्याची मागणी ग्रामस्थांनी मुरबाड आगारप्रमुखांकडे निवेदनाद्वारे केली आहे. वैशाखरे, प्रधानपाडा, गोड्याचापाडा, पेंढरी वाघवाडी, उंबरवाडी या गावांतील पेंढरीहून सकाळी ७ वाजता आणि मुरबाडहून ११.३० व ५ वाजता ही बससेवा तातडीने सुरू करण्यात यावी, असे निवेदनात नमूद केले आहे. निवेदन देताना ठाणे-पालघर सहकार बोर्डाचे संचालक प्रकाश पवार, संजय पवार, विलास घरत, मेर्दीचे सरपंच पांडुरंग दरवडा, माळचे उपसरपंच किसन शिद आणि पेंढरी ग्रामपंचायत सदस्या यशवंत गायकर उपस्थित होते.