तुर्भे, ता. २३ (बातमीदार) : लग्न करणे सोपे, मात्र विवाह नोंदणी प्रमाणपत्र मिळविणे कठीण, अशी स्थिती सध्या शहरात निर्माण झाली आहे, मात्र ऑनलाइन सेवेमुळे ऐरोली विभाग कार्यलयात अवघ्या ३६ तासांत तत्‍काळ सेवेंतर्गत विवाह नोंदणी प्रमाणपत्र दिले जात असल्‍याने नागरिकांमधून समाधान व्यक्‍त होत आहे.
महापालिकेच्या प्रभाग कार्यालयांकडे सर्व कागदपत्रांची पूर्तता केल्यानंतरही अनेक दिवस प्रमाणपत्र मिळत नाही. वरिष्ठ अधिकारी प्रमाणपत्रावर वेळेवर सह्याच करीत नाहीत. त्यामुळे सर्वसामान्यांना मनस्‍ताप सहन करावा लागतो. ऐरोली विभाग कार्यालयात वेगवान सेवेमुळे अवघ्या ३६ तासांत विवाह नोंदणी प्रमाणपत्र दिले जात आहे. विवाह नोंदणी केल्‍यावर प्रमाणपत्र मिळण्यासाठी साधारण १५ ते ६० दिवसांचा कालावधी लागतो, पण ऐरोली विभाग कार्यलयात विवाह नोंदणी विभागाच्या तत्‍काळ ऑनलाइन सेवेमुळे कमी वेळेत प्रमाणपत्र मिळत आहे.

कागदपत्रांची पूर्तता आवश्‍यक
ऑनलाइन सेवेमुळे विवाह प्रमाणपत्र देण्यास विलंब लागत नाही. कागदपत्रांची पूर्तता केल्यास विवाह प्रमाणपत्र मिळण्यासाठी अडचणी येते नसल्‍याचे ऐरोली विभाग कार्यालयातील सहाय्यक आयुक्‍त सुनील कोठूले यांनी सांगितले.