किन्हवली, ता. २४ (बातमीदार) : नालंदा ऑर्गेनायजेशन राज्यस्तरीय ग्रामसमृद्धी पुरस्कारासाठी ठाणे जिल्ह्यातील कसारा येथील पोलिस पाटील अशोक कर्डक यांची निवड झाली आहे. त्यांना नुकतेच पुण्यातील एस. एम. जोशी सभागृहात हा पुरस्कार बहाल करण्यात आला. सामाजिक आणि विविध क्षेत्रांतील योगदानामुळे हा पुरस्कार देण्यात येतो. पुरस्कारासाठी राज्यातील सरपंच, ग्रामसेवक, पोलिस पाटील, सामाजिक कार्यकर्ते, कलावंत अशा ८० जणांची निवड करण्यात आली होती. नागपूर, विदर्भ, मराठवाडा, कोकण, ठाणे, नाशिक, कोल्हापूर आदी विभागांतून सर्वेक्षण करून पुरस्कार्थींची निवड केली. कोरोनाकाळात गरजू लोकांना केलेली भरीव मदत, शाळेतील विद्यार्थ्यांना दिलेल्या बाल गोपाळ पंगती, वह्या तथा शालोपयोगी साहित्य वितरण अशा योगदानाबद्दल अशोक कर्डक यांना हा पुरस्कार देण्यात आला.