अंबरनाथ ता. २३ (वार्ताहर) : मुख्यमंत्री देवेंद्र फडणवीस यांच्या वाढदिवसानिमित्त अंबरनाथमध्ये भाजपच्या वतीने पूर्वेतील छत्रपती शिवाजी महाराज चौक येथे आरोग्य तपासणी शिबिर घेण्यात आले. शिबिराचे उद्‍घाटन भाजप राज्य संघटन परिषदेचे सदस्य गुलाबराव करंजुले पाटील यांच्या हस्ते करण्यात आले.
वाणिज डायग्नोस्टिक मेडीक्वेस्ट सेंटरतर्फे मधुमेहमुक्त भारत अभियानांतर्गत मधुमेह तपासणी शिबिर; तसेच साई सिटी हॉस्पिटलतर्फे सामान्य आरोग्य तपासणी, शस्त्रक्रियामुक्त मार्गदर्शन आणि सल्ला अभियान राबवण्यात आले. प्लाझ्मा ब्लड बँकेच्या सहकार्याने घेतलेल्या रक्तदान शिबिराला अनेक नागरिकांनी सहभाग घेतला. १५० दात्यांनी रक्तदान केले. या दात्यांना प्रमाणपत्र, गुलाबाचे फुल देऊन सन्मानित केले. या वेळी कल्याण जिल्हा सरचिटणीस अभिजित करंजुले पाटील, अंबरनाथ पूर्व मंडळ शहराध्यक्ष विश्वजीत करजुले पाटील यांच्यासह शहर सरचिटणीस दिलीप कणसे, राजेंद्र कुलकर्णी, डॉ. गणेश राठोड, डॉ. विनोद वाणी, पश्चिम मंडळाचे अध्यक्ष लक्ष्मण पंत, प्रजेश तेलंगे, अनिल गायकवाड भाजपचे पदाधिकारी, कार्यकर्ते मोठ्या संख्येने उपस्थित होते.