अग्निशामक शुभांगी घुलेंचा आयुक्तांच्या हस्ते सत्कार;
जागतिक स्पर्धेत भारतासाठी कांस्य व रौप्यपदक
पनवेल, ता. २३ (बातमीदार) : अमेरिकेतील अल्बामा येथे पार पडलेल्या २१व्या जागतिक पोलिस व अग्निशमन स्पर्धा २०२५ मध्ये ऐतिहासिक कामगिरी केल्याबद्दल पनवेल महापालिकेच्या अग्निशामक शुभांगी घुले यांचा पनवेल महापालिकेचे आयुक्त तथा प्रशासक मंगेश चितळे यांच्या हस्ते सत्कार करण्यात आला. महापालिकेच्या बैठकीत शुभांगी यांना पुष्पगुच्छ देऊन सन्मानित करण्यात आले.
अल्बामा येथे झालेल्या आंतरराष्ट्रीय स्पर्धेत ५० पेक्षा अधिक देशांचे प्रतिनिधी सहभागी झाले होते. शुभांगी घुले यांनी ‘अल्टिमेट फायर फायटिंग चॅलेंज’ स्पर्धेत कांस्यपदक, ‘फायर स्टेअर रेस’ या सांघिक प्रकारात रौप्यपदक, तसेच वैयक्तिक स्पर्धांमध्ये चौथा व पाचवा क्रमांक पटकावत भारताचे नाव उज्ज्वल केले. त्यांची ही वेगवान, अचूक आणि तडफदार कामगिरी जागतिक पातळीवर विशेष ठरली आहे. या सत्कारप्रसंगी अतिरिक्त आयुक्त कैलास गावडे, उपायुक्त डॉ. वैभव विधाते, प्रसेनजित कारलेकर, रविकिरण घोडके, स्वरूप खारगे, अभिषेक पराडकर, मुख्य लेखा व वित्त अधिकारी मंगेश गावडे, शहर अभियंता संजय कटेकर, मुख्य वैद्यकीय अधिकारी डॉ. आनंद गोसावी, शिक्षणाधिकारी रमेश चव्हाण, तसेच सर्व प्रभाग अधिकारी, विविध विभागप्रमुख आणि महापालिकेचे अधिकारी उपस्थित होते.
..................
महापालिकेचा अभिमान; आयुक्तांचे मत
याप्रसंगी आयुक्त मंगेश चितळे म्हणाले, पनवेल महापालिकेच्या अग्निशमन विभागाचे प्रतिनिधित्व करीत शुभांगी घुलेंनी जागतिक स्तरावर भारताचा तिरंगा उंचावला आहे, याचा आम्हाला अभिमान आहे. भविष्यातही अशा स्पर्धांमध्ये भाग घेण्यासाठी महापालिकेच्या वतीने संपूर्ण सहकार्य व विशेष प्रशिक्षणाची सुविधा दिली जाईल.
................
प्रेरणादायी व्यक्तिमत्त्व
शुभांगी घुलेंनी आपल्या धैर्य, मेहनत आणि समर्पणाच्या जोरावर संपूर्ण देशासाठी आदर्श घालून दिला आहे. त्यांच्या या यशामुळे केवळ पनवेल महानगरपालिकेचेच नव्हे, तर संपूर्ण महाराष्ट्राचे नाव उज्ज्वल झाले आहे. त्यांच्या या कामगिरीमुळे महिला अग्निशामकांमध्येही एक नवा आत्मविश्वास निर्माण झाला आहे. पनवेल महापालिकेच्या वतीने पुढील काळात अशा खेळाडूंना प्रशिक्षण, सुविधा व प्रोत्साहन देण्यावर भर दिला जाणार आहे, अशी माहिती या वेळी अधिकाऱ्यांनी दिली.