भिवंडीत नऊ तास पाणीपुरवठा बंद
भिवंडी, ता. २३ (वार्ताहर) : भिवंडी महापालिकेला मुंबई महानगरपालिकेद्वारे होणाऱ्या पाणीपुरवठ्यात गुरुवारी (ता. २४) रोजी तांत्रिक कामासाठी नऊ तासांचा शटडाऊन घेतला जाणार आहे. सकाळी १० ते सायंकाळी ७ या कालावधीत संपूर्ण शहरात पाणीपुरवठा पूर्णतः बंद राहणार असल्याचे पाणीपुरवठा विभागातर्फे कळविण्यात आले आहे. या कालावधीत जलजोडणीवर नवीन जलमापक बसवण्याचे काम हाती घेण्यात येणार आहे. त्यामुळे नागरिकांनी आवश्यक पाणी साठवून ठेवण्याचे आवाहन करण्यात आले आहे. तसेच २५ जुलै रोजी एक दिवस पाणी कमी दाबाने आणि मर्यादित प्रमाणात येणार असल्याची माहितीही देण्यात आली आहे. महानगरपालिकेने नागरिकांनी संयम बाळगावा आणि या कामात पालिकेस सहकार्य करावे, असे आवाहन केले आहे. अशा प्रकारच्या नियोजित कामांमुळे भविष्यातील पाणीपुरवठा अधिक प्रभावी आणि अचूक होईल, असा विश्वास पालिका प्रशासनाने व्यक्त केला आहे.