एकतर्फी प्रेमातून
महिलेच्या पतीची हत्या
खाडी परिसरात मृतदेह पुरला
नवी मुंबई, ता. २३ (वार्ताहर) : विवाहितेने लग्नास नकार दिल्याने तिच्यावर एकतर्फी प्रेम करणाऱ्या तरुणाने महिलेच्या पतीची निर्घृण हत्या करून त्याचा मृतदेह वाशी गावालगतच्या खाडीकिनारी पुरल्याचा धक्कादायक प्रकार उघडकीस आला आहे. वाशी पोलिसांनी या हत्या प्रकरणाचा तपास करताना आरोपी अमीनूर अली अहेमदअली मौल्ला (वय २१) याला अटक केली आहे. त्याने दिलेल्या माहितीवरून वाशी गावालगतच्या खाडीतून विवाहितेच्या पतीचा मृतदेह ताब्यात घेतला आहे.
आबुबकर सुहादअली मंडल (३५) असे मृताचे नाव आहे. तो वाशी गावात केरला हाउससमोरील झोपडपट्टीत पत्नी फातिमा आबुबकर मंडल (२५) आणि दोन मुलींसोबत राहत होता. आरोपीला २८ जुलैपर्यंत पोलिस कोठडी सुनावली आहे.