जेसीबीच्या धडकेत जलवाहिनी फुटली; लाखो लिटर पाण्याची नासाडी
अंबरनाथ, ता. २४ (वार्ताहर) : पश्चिमेतील भेंडीपाडा येथे गुरुवारी (ता. २४) सकाळी साडेदहाच्या सुमारास झालेल्या एका अपघातात एमआयडीसीची मुख्य जलवाहिनी फुटली. त्यामुळे लाखो लिटर पिण्याचे पाणी वाया गेले. ही घटना कचरा उचलण्यासाठी आलेल्या जेसीबी वाहनाच्या निष्काळजीमुळे घडली. जेसीबीने जलवाहिनीच्या वॉलला धडक दिल्याने वाहिनी तुटून पाण्याचा फवारा रस्त्यावर उडाला.
एमआयडीसीच्या अधिकाऱ्यांनी दिलेल्या माहितीनुसार, घटनेची माहिती मिळाल्यानंतर सुमारे दीड ते दोन तासांत तांत्रिक कर्मचारी घटनास्थळी दाखल झाले. त्यांनी तत्काळ वॉल बंद करून पाण्याचा प्रवाह थांबवला आणि दुरुस्तीचे काम सुरू केले. या अपघातामुळे केवळ पाण्याची मोठी नासाडी झाली नाही, तर रस्त्यावर पाणी साचल्यामुळे वाहतुकीला अडथळा निर्माण झाला. जेसीबी चालकाच्या बेजबाबदारपणामुळे हा अपघात घडला असून, त्याची जबाबदारी निश्चित करण्याची मागणी स्थानिक नागरिकांकडून केली जात आहे.