डायमंडचे विद्यालय चमकत राहील : समीर शेडगे
रोहा, ता. २४ (बातमीदार) ः आज सर्वत्र शैक्षणिक संस्था वाढत चालल्या आहेत. मुस्लिम समाजातील मुली-मुले मोठ्या प्रमाणात उच्च शिक्षण घेत आहेत. अष्टमी येथील डायमंड एज्युकेशनल अँड वेल्फअर असोसिएशनच्या माध्यमातून सुरू असलेले मेहबूब स्कूल हे विद्यालय आपली दिवसेंदिवस गुणवत्ता वाढवत आहे. हिरा जरा चमकतो, तशा पद्धतीने या डायमंड संस्थेची शाळा शैक्षणिक क्षेत्रात चमकत राहील, असे गोरवोद्गार रोह्याचे माजी नगराध्यक्ष समीर शेडगे यांनी काढले.
डायमंड एज्युकेशन अँड वेल्फअर असोसिएशन संचालित मेहबूब स्कूलला जनार्दन शेडगे मित्र मंडळाच्या वतीने नवीन बॅंचेस, लॉकर्स व शैक्षणिक साहित्य देण्यात आले. या कार्यक्रमाचे औचित्य साधून शाळेत आयोजित छोटेखानी कार्यक्रमाप्रसंगी समीर शेडगे यांनी आपल्या भावना व्यक्त केल्या. डायमंड संस्थेचे संस्थापक अध्यक्ष जाफरखान देशमुख यांनी लावलेले रोपटे आता वटवृक्ष म्हणून नावारूपाला आला आहे. आम्हाला माहीत आहे, की इंग्रजी शाळा सुरू करणे सोपे आहे; पण चालविणे खूप कठीण आहे, म्हणून मी आणि संतोष पोटफोडे या पुढे एकत्र येऊन तरुण पिढीच्या उज्ज्वल भवितव्यासाठी निश्चितच काम करणार, अशी ग्वाही माजी नगराध्यक्ष समीर शेडगे यांनी दिली. डायमंड शाळेच्या पायाभरणी पासून मी मुस्लिम समाजाच्या सोबत आहे. खासदार सुनील तटकरे यांच्या अथक प्रयत्नाने या भागात इंग्रजी शाळेबरोबर उर्दू माध्यमिक शाळा इमारतदेखील बांधून देण्यात आली आहे. या शाळेकडेदेखील समीर आणि मी जातीने लक्ष देऊ, असे सांगत समीर शेडगे यांच्या समाजकार्याला माजी नगराध्यक्ष संतोष पोटफोडे यांनी मनापासून शुभेच्छा दिल्या. या वेळी प्रमुख अतिथी माजी नगराध्यक्ष संतोष पोटफोडे, समाजसेविका डॉ. अवनी समीर शेडगे, ट्रस्टचे सदस्य सचिन शेडगे, डायमंड संस्थेचे अध्यक्ष समीर दर्जी, उपाध्यक्ष खालिद बेबन, समाज अध्यक्ष शफी पानसरे, खजिनदार मुनवर पठाण, सचिव अफसर करजिकर, अष्टमी ग्रामस्थ मंडळ अध्यक्ष महादेव साळवी, अरिफ पठाण तसेच जामे मशीद अष्टमीचे आजी माजी पदाधिकारी सदस्य, डायमंड संस्थेचे सदस्य व अष्टमी ग्रामस्थ मोठ्या संख्येने उपस्थित होते. या वेळी संस्थेच्या वतीने समीर शेडगे यांना भेटवस्तू व शाल देऊन सन्मानित करण्यात आले.