फादर दिब्रिटोंचा यांच्या प्रथम स्मृतिदिनानिमित्त पुस्तकांचे प्रकाशन
विरार, ता. २४ (बातमीदार) ः ज्येष्ठ विचारवंत साहित्यिक, पर्यावरणवादी समाजसेवक आणि ९३ व्या अखिल भारतीय मराठी साहित्य संमेलनाचे अध्यक्ष फादर फ्रान्सिस दिब्रिटो यांच्या प्रथम वार्षिक स्मृतिदिनाचे औचित्य साधून त्यांचे कुटुंबीय आणि प्रबोधन प्रतिष्ठान यांच्या संयुक्त विद्यमाने विशेष कार्यक्रमांचे आयोजन केले आहे. शुक्रवार (ता. २५) विरारजवळील नंदाखाल येथील पवित्र आत्मा चर्चमध्ये प्रार्थना होईल. शाळेच्या दुसऱ्या माळ्यावरील सभागृहात पुस्तक प्रकाशनाचे आयोजन केले आहे.
या प्रसंगी फादर फ्रान्सिस दिब्रिटो लिखित आणि राजहंस प्रकाशन प्रकाशित सुबोध बायबल या महाग्रंथाच्या तिसऱ्या आवृत्तीचे प्रकाशन होणार आहे तसेच सर्वोत्तम व समकालीन फादर दिब्रिटो या पुस्तकासोबत फादरांच्या नाही मी एकला या आत्मचरित्राच्या इंग्रजी अनुवादित पुस्तक आणि याचे ई-पुस्तकही प्रकाशित होणार आहे. या कार्यक्रमाला वसई धर्मप्रांताचे बिशप थॅामस डिसोजा, सुवार्ताचे संपादक फादर जोएल डिकुन्हा तसेच राजहंस प्रकाशनच्या वतीने करुणा गोखले उपस्थित राहणार आहे. हा कार्यक्रम सर्वांसाठी खुला असून सर्वांनी मोठ्या संख्येने उपस्थित राहावे, असे आवाहन प्रबोधन प्रतिष्ठानतर्फे केले आहे.