कोपरी पुलाच्या कामाला मिळाला मुहूर्त
ठाणे पूर्व सॅटीस पुलावर गर्डर बसविणार
सकाळ वृत्तसेवा
ठाणे, ता. २४ : ठाणे पूर्व स्थानकाचा परिसर कोंडीमुक्त करण्यासाठी स्मार्ट सीटीअंतर्गत महत्त्वाचा आणि महत्त्वाकांक्षी प्रकल्प कोपरी सॅटीस-२ हाती घेण्यात आला आहे. या प्रकल्पाचे काम ८० टक्के पूर्ण झाले आहे. अंतिम टप्प्यात आलेल्या या प्रकल्पाचे गर्डर टाकण्यासाठी मध्य रेल्वेकडून किमान १४ तासांचा मेगा ब्लॉक हवा आहे. तशी मागणीही ठाणे पालिकेने रेल्वे प्रशासनाकडे केली होती. त्यानुसार आता, रेल्वे प्रशासनाने त्यास हिरवा कंदील दिला असून, या कामातील अडथळा दूर झाला आहे. तसेच २६ जुलै ते ३ ऑगस्ट या कालावधीत हे काम करण्यात येणार आहे. यासाठी ठाणे पश्चिम आणि पूर्व बाजूला जोडणाऱ्या कोपरी पुलावरील वाहतूक आठ दिवस ठरावीक वेळेत बंद ठेवण्यात येणार आहे. त्यासाठी वाहतूक पोलिसांनी अधिसूचना काढली आहे. त्यामुळे अखेर अखेर कोपरी पुलाच्या कामाला मुहूर्त मिळाल्याचे दिसून येत आहे.

ठाणे स्थानकातून दररोज सुमारे साडेसात लाख प्रवासी प्रवास करतात. स्थानकाच्या पश्चिम भागात सॅटीसची उभारणी केली आहे. या सॅटीसमुळे स्थानक परिसरातील वाहतुकीला शिस्त लागली नसली तरी कोंडीतून मोठा दिलासा मिळाला आहे. त्याच धर्तीवर ठाणे स्थानकाच्या पूर्वेकडील वाहतूक कोंडी कमी करण्यासाठी महापालिका प्रशासनाने स्मार्ट सीटीअंतर्गत कोपरी येथे स्थानक परिसर वाहतूक सुधारणा म्हणजेच सॅटीस-२ प्रकल्पाचे काम सुरू केले आहे.

नियोजनानुसार हा प्रकल्प २०२२ पर्यंत पूर्ण होणे अपेक्षित होते, पण रेल्वेच्या जागेत हा प्रकल्प होणार असल्याने विविध कामांसाठी शासकीय परवानग्यांसाठी मोठा कालावधी त्यासाठी लागला. अडचणींचा सामना करीत हा प्रकल्प आता अंतिम टप्प्यात आला असून, ८० टक्के काम पूर्ण झाले आहे. या प्रकल्पातील उड्डाणपुलासाठी रेल्वे रुळांच्या दोन्ही बाजूला खांबांची उभारणी काही वर्षांपूर्वी केली; मात्र काही तांत्रिक अडचणीमुळे या ठिकाणी खांबांवर गर्डर टाकणे शक्य होत नव्हते. या अडचणी दूर करत पालिकेने रेल्वे विभागाला पत्र पाठवून मार्गिका जोडणी कामासाठी रेल्वेचे दोन तासांचे १४ मेगाब्लाॅक देण्याची मागणी केली होती. त्यास रेल्वे विभागाने हिरवा कंदील देताच पालिकेने २६ जुलै ते ३ ऑगस्ट या कालावधीत हे काम करण्याचा निर्णय घेऊन त्याचे नियोजन आखले आहे. ४६ मीटर लांब आणि १२ मीटर रुंद गर्डर असल्याची माहिती पालिका सूत्रांनी दिली.

असा आहे प्रकल्पाचा आराखडा
तुळजा भवानी मंदिर, पूर्व द्रुतगती महामार्गावरील सेवा रस्ता ते कोपरी कन्हैया नगर, एमजेपी कार्यालयापर्यंत एकूण २.२४ किमी लांबीचा उन्नत मार्ग आहे. यात १२ मीटर रुंद मार्गिका असून, स्थानकात वाहतूक व्यवस्थापनासाठी नऊ हजार चौरस मीटर डेक उभारणी करण्यात येणार आहे. डेक उन्नत मार्गाला जोडण्यात येणार असून, त्यात स्थानक इमारतीचाही समावेश असणार आहे.