सानपाडा स्थानक परिसरातील रस्त्यांची दुरवस्था
मनसेकडून सिडकोला तातडीच्या दुरुस्तीची मागणी
तुर्भे, ता. २४ (बातमीदार) : सानपाडा रेल्वेस्थानकासमोरील रिक्षा स्टँड आणि सेक्टर-३० मधील बसस्थानक परिसरातील रस्ते आणि पदपथांची दुरवस्था झाली आहे. पावसामुळे पडलेले खड्डे, साचलेले पाणी आणि उखडलेले पदपथ यामुळे प्रवाशांना मोठ्या अडचणींचा सामना करावा लागत आहे. या पार्श्वभूमीवर महाराष्ट्र नवनिर्माण सेनेच्या सानपाडा विभाग अध्यक्ष योगेश शेटे यांनी सिडकोच्या कार्यकारी अभियंता आर. एन. दिवेकर यांची भेट घेऊन तातडीने सुधारणा करण्याचे निवेदन सादर केले. या वेळी महाराष्ट्र सैनिक शशिकांत गायकवाड उपस्थित होते.
एक महिन्यापूर्वी सिडकोकडून रिक्षा स्टँड परिसरातील रस्त्याचे डांबरीकरण करण्यात आले होते, मात्र अवघ्या आठवडाभरातच पुन्हा खड्डे पडल्यामुळे प्रवाशांमध्ये संतापाची लाट पसरली आहे. मनसेने या वेळी सिडकोच्या निकृष्ट दर्जाच्या कामावर तीव्र नाराजी व्यक्त करताना, ‘‘जनतेला चुना लावण्याचे काम सिडकोने केले आहे’’, अशी टीका केली. रस्ता व पदपथांची जबाबदारी सिडकोची असून, तत्‍काळ सुधारणा न झाल्यास ‘मनसे स्टाइल’मध्ये जनआंदोलन छेडले जाईल, असा इशारा मनसेने पत्रात दिला आहे.
................
सिडकोकडून पाहणीचे आश्वासन
सिडकोचे कार्यकारी अभियंता आर. एन. दिवेकर यांनी लवकरच स्थानिक अधिकाऱ्यांच्या माध्यमातून रस्त्यांची व पदपथांची पाहणी करून सुधारणा करण्यात येईल, असे आश्वासन मनसेच्या शिष्टमंडळाला दिले आहे.