पोलादपूरमध्ये पावसाचा जोर कायम
सरासरी २००० मिमी पार; आपत्तीचा धोका कायम, प्रशासन अलर्टवर
पोलादपूर, ता. २६ (बातमीदार) ः पोलादपूर तालुक्यात यंदाच्या पावसाळी हंगामात पावसाने दमदार हजेरी लावत २४ जुलैपर्यंत २,०४३ मिमी पावसाची नोंद झाली आहे. ही सरासरी जुलै अखेरपर्यंत वार्षिक सरासरीच्या ५८ टक्केपर्यंत पोहोचली असून, नद्या दुथडी भरून वाहू लागल्या आहेत. सुदैवाने अद्याप कोणतीही जीवितहानी झालेली नाही; मात्र दरड व झाडे कोसळण्याच्या घटना सतत घडत असल्याने आपत्तीचे सावट कायम आहे.
आपत्ती व्यवस्थापन कक्षानुसार, गेल्या वर्षी याच कालावधीत २,१६८ मिमी पावसाची नोंद झाली होती. यंदा जुलैअखेरपर्यंत पावसाचे प्रमाण थोडेसे कमी असले तरी हवामान खात्याच्या अंदाजानुसार २०२५ मध्ये सरासरीपेक्षा २०-२५ टक्के अधिक पावसाची शक्यता वर्तवण्यात आली आहे. मे महिन्यातच अवकाळी पावसाने ५०० मिमीचा टप्पा गाठला होता. त्यानंतर जून आणि जुलैमध्ये झालेल्या मुसळधार पावसामुळे वाकण, कोंढवी, पोलादपूरसह घाटमाथ्याच्या भागात पावसाचा जोर अधिक जाणवतो आहे.
.............
घाटांमध्ये दरडींचे प्रमाण वाढले
जुलै महिन्यात आंबेनळी घाट, जुना कशेडी घाट, कशेडी बोगदा मार्ग, पलचिल व कुडपण मार्गांवर दरडी कोसळून वाहतूक काही वेळ ठप्प झाली होती. दरडी कोसळण्याचे प्रमाण लक्षात घेता, १५ ऑगस्ट २०२५ पर्यंत पोलादपूर-महाबळेश्वर मार्गावरील अवजड वाहतूक बंद करण्यात आली आहे. हलकी वाहने केवळ दिवसा सुरू आहेत, तर रेड व ऑरेंज अलर्टच्या वेळी पूर्ण वाहतूक बंद ठेवली जात आहे. गुरुवारी (ता. २४) दुपारी साडेबारा वाजता आंबेनळी घाटातील कापडे खुर्द गावाजवळ दरड कोसळली, यापूर्वीही येथे मातीचा ओसरा खचला होता. झाडे कोसळण्याच्या घटना मेपासूनच सुरू असून, जुलैमध्ये त्यात मोठ्या प्रमाणात वाढ झाली आहे. यामुळे नागरिकांमध्ये भीतीचे वातावरण आहे.
................
आपत्ती व्यवस्थापन अलर्ट मोडवर
नैसर्गिक आपत्ती घडल्यानंतर पोलादपूर तालुका प्रशासन वेगाने प्रतिसाद देत आहे. दरडग्रस्त ठिकाणी तत्काळ पोहोचून रस्ते मोकळे करण्यात येत आहेत. तहसीलदार कपिल घोरपडे, गटविकास अधिकारी दीप्ती गाट, सहाय्यक पोलिस निरीक्षक आनंद रावडे, तसेच आपत्ती निवारण कक्ष व रेस्क्यू टीमचे सदस्य सतत अलर्ट मोडवर असून संभाव्य आपत्तींना तोंड देण्यासाठी सर्व यंत्रणा सज्ज आहेत.