‘उडान’ महोत्सवात बासरी आणि तबल्याचा मिलाफ

मुंबई : ‘उडान’ या वार्षिक संगीत महोत्सवाचा दहावा सोहळा बुधवारी (ता. ३०) वरळीच्या नेहरू सेंटर ऑडिटोरियमध्ये आयोजित करण्यात आला आहे. जयपूर जेम्स चॅरिटेबल ट्रस्टद्वारे दरवर्षी या सोहळ्याचे आयोजन करण्यात येते. यंदा बासरीसम्राट पद्मश्री पं. रोणू मजूमदार यांचा मंत्रमुग्ध करणारा बासरीवादन कार्यक्रम होणार आहे. त्यांना ओजस अधिया यांची तबल्यावरची साथ असेल तर त्यांना बासरीवादक कल्पेश साचला साथसंगत करणार असल्याची माहिती आयोजकांनी दिली आहे. याखेरीज शास्त्रीय गायन क्षेत्रातील ख्यातीप्राप्त जोडी पं. रितेश मिश्रा आणि पं. रजनीश मिश्रा यांचा स्वरमय कार्यक्रम सादर होईल.
बासरीतील प्रत्येक सूर हा एक प्रार्थनेचा भाव असतो. आजच्या गतिमान जगात संगीत आपल्याला अंतर्मुखतेचा एक निवांत क्षण देत असल्याचे या वेळी पद्मश्री पं. रोणू मजूमदार यांनी सांगितले. तर भविष्यातील कलाकारांना व्यासपीठ उपलब्ध करून देत असल्याचे जयपूर जेम्स चॅरिटेबल ट्रस्टकडून सांगण्यात आले.