प्राचार्य असल्याचा बनाव;
३४ लाख रुपये उकळले!
लिपिकावर गुन्हा दाखल
उल्हासनगर, ता. २४ (वार्ताहर) : उल्हासनगरच्या हिललाइन पोलिस ठाण्याच्या हद्दीत असलेल्या नेवाळी येथील ‘ओम साई इंग्लिश स्कूल’ या खासगी प्राथमिक शाळेत लिपिक पदावर कार्यरत असलेल्या मृगमल्ल अण्णामलई या व्यक्तीने स्वतः प्राचार्य असल्याचे भासवून शाळेच्या नावावर तब्बल ३४ लाख ४५ हजार रुपयांची आर्थिक फसवणूक केल्याची धक्कादायक घटना उघड झाली आहे.

विद्यार्थ्यांचे शैक्षणिक शुल्क आणि इतर शुल्क पालकांकडून गोळा करताना त्याने हे पैसे शाळेच्या अधिकृत खात्यात न भरता स्वतःच्या खात्यात वळवले. या प्रकारामुळे शाळेचे आर्थिक नुकसान झाले असून, संस्थेचे संचालक प्रवीण अलपुरिया यांनी हिललाइन पोलिस ठाण्यात अण्णामलई याच्याविरोधात तक्रार दाखल केली आहे.

नेवाळी नाका परिसरातील ओम साई इंग्लिश स्कूल याच शाळेत मृगमल्ल अण्णामलई हा लिपिक म्हणून कार्यरत होता. शाळेत भेट देताना तो पालकांना स्वतःची प्राचार्य अशी ओळख सांगून दिशाभूल करीत होता. शुल्क घेण्याच्या प्रक्रियेत शाळेला अधिक कर भरावा लागत असल्याचे सांगून पालकांकडून जास्त रक्कम गोळा केली जात होती. या काळात अण्णामलई याने टप्प्याटप्प्याने मिळालेली रक्कम एकूण ३४ लाख ४५ हजार रुपये स्वतःच्या बँक खात्यात जमा केली. ही रक्कम शाळेच्या अधिकृत खात्यात भरली गेली नसल्याचे संचालकांच्या निदर्शनास आल्यावर त्यांनी आढावा घेतला आणि फसवणुकीचा प्रकार उघडकीस आणला.
संचालक प्रवीण अलपुरिया यांनी यासंदर्भात तत्काळ हिललाइन पोलिस ठाण्यात लेखी तक्रार दिल्यानंतर अण्णामलई याच्याविरोधात फसवणुकीचा गुन्हा दाखल करण्यात आला.