घनकचरा विभागात ५६ हजार रिक्त पदे भरणार
अतिरिक्त आयुक्तांचे कामगार सेनेला आश्वासन
सकाळ वृत्तसेवा
मुंबई, ता. २५ ः पालिकेच्या घनकचरा व्यवस्थापन विभागातील सुमारे ५६ हजार पदे रिक्त असल्याने कार्यरत कर्मचाऱ्यांवर अतिरिक्त कामाचा भार येत आहे. याबाबत म्युनिसिपल कर्मचारी कामगार सेनेच्या शिष्टमंडळाने अतिरिक्त आयुक्त अश्विनी जोशी यांना भेटून चर्चा केली. ही पदे टप्प्याटप्प्याने भरण्यात येणार असल्याचे आश्वासन या वेळी जोशी यांनी दिले. त्या भरती झाल्यास कर्मचाऱ्यांवरील अतिरिक्त कामाचा भार कमी होईल, अशी माहिती म्युनिसिपल कर्मचारी कामगार सेनेचे अध्यक्ष बाबा कदम व उपाध्यक्ष डॉ. संजय कांबळे-बापेरकर यांनी दिली.

मुंबई महापालिकेतील कर्मचाऱ्यांच्या विविध प्रश्नांची सोडवणूक करण्यासाठी अतिरिक्त आयुक्त डॉ. अश्विनी जोशी यांच्यासोबत शुक्रवारी (ता. २५) पालिका मुख्यालयात बैठक पार पडली. या बैठकीला उपायुक्त किशोर गांधी, किरण दिघावकर, प्रमुख कामगार अधिकारी सुनील जांगळे, प्रमुख कर्मचारी अधिकारी शारदा गोसावी उपस्थित होते. या वेळी महाराष्ट्र शासनाच्या निर्णयानुसार सफाई खात्यातील कर्मचाऱ्यांप्रमाणेच मलनिस्सारण, मुख्य मलनिस्सारण, गटारे, स्मशानभूमी आदी घाणीशी संबंधित काम करणाऱ्या कामगारांना लाड- पागे समितीच्या शिफारशींअन्वये वारसाहक्क नोकऱ्या दिल्या जाणार आहेत, तर नवीन पेन्शन योजना लागू असणाऱ्या कर्मचाऱ्यांचे गेल्या दोन वर्षांपासून रखडलेले देय दावे लवकर निकाली काढण्यासाठी (डीसी-१ दावे) सुधारित व सोपी नियमावली प्रसारित करण्याच्या सूचना डॉ. जोशी यांनी दिल्याचे बापेरकर यांनी सांगितले.

..
बदली परिपत्रकाची अंमलबजावणी करण्याची मागणी
एकाच ठिकाणी राहून कर्मचाऱ्यांची पिळवणूक करणाऱ्या सफाई खात्याच्या पी. टी. केस खात्यातील तीन लिपिक व केईएम रुग्णालयात सुमारे २६ वर्षे काम करणाऱ्या कर्मचाऱ्याची तत्काळ बदली करण्याचे आदेश जोशी यांनी दिले. त्यामुळे बदली परिपत्रकाची प्रभावीपणे अंमलबजावणी करण्याची मागणी मान्य करण्यात आल्याची माहिती बापेरकर यांनी दिली.
...........