रस्त्यांवरील खोदकामास परवानगी द्यावी
मुंबई, ता. २५ : मुंबईत जुन्या जलवाहिन्या व वीजवाहिन्यांत सातत्याने बिघाड होत असतो. त्यामुळे त्यांच्या दुरुस्तीसाठी वेळेवर परवानगी न मिळाल्याने परिस्थिती आणखी गंभीर हाेऊन नागरिकांना त्याचा त्रास हाेताे. माजी नगरसेवक जावेद जुनेजा यांनी मुंबई महापालिका आयुक्त भूषण गगराणी यांच्याकडे निवेदन सादर करून रस्त्यांवरील अत्यावश्यक खोदकामासाठी परवानगी प्रक्रियेत शिथिलता आणण्याची मागणी केली आहे.
जुन्या सुविधांच्या दुरुस्तीकरिता रस्ते खोदण्याची वेळ येते; मात्र महापालिकेच्या परिपत्रकानुसार डीएलपी रस्त्यांवर तीन वर्षे आणि नॉन डीएलपी रस्त्यांवर तीन वर्षांहून अधिक काळ खोदकामास बंदी आहे. या निर्णयामुळे शहरातील अनेक ठिकाणी अडचणी निर्माण झाल्या आहेत. विभागीय अभियंता कार्यालयाकडून खाेदकामाची परवानगी मिळण्यासाठी १५ ते २० दिवस लागतात. त्यामुळे पूर्वीप्रमाणे विभागीय आयुक्तांना खोदकामासाठी परवानगी देण्याचे अधिकार पुन्हा बहाल करून अत्यावश्यक सेवांच्या सुरळीत कार्यवाहीसाठी रस्त्यावर खोदकामांना परवानगी द्यावी, अशी मागणी माजी नगरसेवक जुनेजा यांनी केली आहे.