गोकुळ झा पुन्हा पोलिसांच्या ताब्यात
डोंबिवली, ता. २५ : धोकादायक शस्त्रे व साधनांनी स्वेच्छेने दुखापत करणे आणि सरकारी कामात अडथळा निर्माण करणे अशा दोन गुन्ह्यांप्रकरणी आज मानपाडा पोलिसांनी आरोपी गोकुळ झा याला न्यायालयाकडून ताब्यात घेतले आहे. कल्याण पूर्व येथील रिसेप्शनिस्ट तरुणीवर केलेला जीवघेणा हल्ला आणि तिच्या मनास लज्जा उत्पन्न होईल असे कृत्य केल्याच्या आरोपाखाली मानपाडा पोलिसांनी या आधीच त्याला अटक करून न्यायालयात हजर केले होते. कल्याण न्यायालयाने १४ दिवसांची न्यायालयीन कोठडीची शिक्षा सुनावल्यानंतर, त्याला जेलमध्ये नेत असताना अन्य दोन गुन्ह्यांबाबत पुन्हा मानपाडा पोलिसांनी त्याला अटक करून ताब्यात घेतले. आराेपीस उद्या शनिवारी (ता. २६) पुन्हा कल्याण न्यायालयात हजर करून रिमांड मागणार असल्याची माहिती कल्याण पोलिस उपायुक्त अतुल झेंडे यांनी दिली आहे.